Almatyda táýelsizdik jyldary Memleket basshysynyń qoldaýy arqasynda 117 oqý oryndary salyndy. Tek sońǵy bes jyl ishinde ǵana megapolıste bilim salasyn qarjylandyrý 37%-ǵa ósti nemese 27 mlrd. teńgege jetti. Bul týraly Almaty ákimi Baýyrjan Baıbek qalanyń pedagogtar qaýymdastyǵymen kezdesý kezinde aıtty. Onyń ústine búgingi kúni bilim salasynyń ınfraqurylymyn damytýǵa erekshe nazar aýdarylýda. Tek bıylǵy jyldyń ózinde ǵana qurylys pen kúrdeli jóndeý jumystaryna 17 mlrd. teńgeden astam qarjy bólindi.
Qalanyń úzdik pedagogtaryn saltanatty túrde ulyqtaý barysynda Baýyrjan Baıbek Memleket basshysy Joldaýyn júzege asyrý aıasynda bilim jáne ǵylym mınıstrliginiń «Pedagogtyń mártebesi týraly» jáne «Oqýshy men muǵalimniń júktemesin azaıtý boıynsha birqatar zań aktilerine ózgerister men qosymshalar engizý týraly» zańdardyń jobalaryn daıyndaǵanyn atap ótti.
Kezdesýdi paıdalanǵan qala basshysy bilim salasy uıymdarynyń barlyq pedagogtaryn jáne qalanyń ata-analar qaýymdastyǵyn atalǵan zań jobalaryn talqylaýǵa belsendi túrde qatysýǵa shaqyrdy.
«Eń mańyzdysy, Jobadan qazaqstandyq pedagogtar óz jumystarynyń joǵary baǵaǵa ıe ekenin, bilim salasynda týyndaǵan barlyq máselelerge, oqýshylar men muǵalimderge jete nazar aýdarylatynyn kórdi. Sizderdiń qalanyń bilim salasyn damytýǵa qosqan úlesterińiz óte joǵary, jaýapty ári qıyndyǵy mol ustazdyq qyzmetterińizge alǵys aıtamyn. Oqýshylardyń túrli bilim saıystarynda bıik jeńisterge jetýi ári jeke kásibı biliktilik jumystaryńyzdyń sapasyn aıqyndaı túsedi», - dep atap ótti Baýyrjan Baıbek.
Aıta keterligi, jyl basynan beri qaraı jańasha bilim berýge kirisken Almaty muǵalimderiniń 70%-nyń jalaqysy 30 paıyzǵa ósti. Óz kezeginde 1 qyrkúıekten bastap ulttyq kásibı testileýden ótken 1293 muǵalim alǵash ret ózderiniń qyzmettik eńbekaqysyna 30 dan 50%-ǵa deıin qosymsha aqy alatyn bolady.
Bulardan ózge, memleket aǵylshyn tilin oqytatyn muǵalimderge qoldaý kórsetýde. Mine, bıyl ekinshi jyl fızıka, hımıa, bıologıa men ınformatıka pánderin aǵylshyn tilinde oqytatyn muǵalimderge qyzmettik jalaqylaryna qosa 200%-dyq kólemde qosymsha aqy tólenedi.
