Almatyda kórnekti memleket jáne qoǵam qaıratkeri, saıası qýǵyn-súrgin qurbany Janaıdar Sádýaqasovtyń qurmetine eskertkish taqta ornatyldy.
Qaıratkerdiń aty-jóni men sýreti beınelengen taqtaısha qaladaǵy Nazarbaev dańǵyly jáne Bógenbaı batyr kóshesiniń qıylysyndaǵy ózi turǵan úıdiń qabyrǵasyna ilindi.
Janaıdar Sádýaqasov birqatar jaýapty memlekettik qyzmetter atqarǵan. Jazyqsyz atylyp ketken arystar ishinde Janaıdar Sádýaqasovtyń orny bólek deıdi tarıhshylar. Jastaıynan bilimge qushtar bolǵan ult janashyry nebári jıyrma jasynda jasyryn uıym quryp, Kolchaktyń buǵaýyndaǵy tutqyndardy aýyr azaptan qutqarýǵa úles qosqan.
«Janaıdardyń jáne bir erekshe aıtatyn eńbegi – qazaq tiline memlekettik mártebe berý jolyndaǵy qaıratkerligi. 1920 jyly Janaıdar KazSIK-tiń Ortalyq komıtetiniń dekretin qabyldatyp, sol boıynsha is-qaǵazdary qazaqsha ótetin boldy. Jáne ol isti Janaıdar sharýa tilmashtarǵa, aýdarmashylarǵa tapsyra salmaı, ózi júrgizip otyrǵan. Ol sharýaǵa búkil qoǵam, búkil zıaly qaýym qolushyn berý, sol úshin eńbek etýi kerek boldy. Mine, sol arqyly máseleniń ózektiligin jetkizgen bolatyn», – deıdi tarıh ǵylymdarynyń doktory Hangeldi Ábjanov.
