Almatyda Qazaqstannyń Eńbek eri Aıagúl Mırazova atyndaǵy shyǵarmashylyq zerthana ashyldy. Onda mektep dırektorlary men muǵalimderdiń biliktiligin arttyrý boıynsha jumystar jasalady.
Zerthana bilim berý isiniń qurmetti qyzmetkeri Aıagúl Tóreqyzynyń 70 jas mereıtoıy qarsańynda ashylǵan. Ulaǵatty ustaz qaladaǵy Ybyraı Altynsarın atyndaǵy bilim ordasyn shırek ǵasyr boıy basqarǵan. Osy jyldar ishinde atalǵan oqý orny elimizdegi eń myqty bilim oshaǵynyń birine aınaldy.
«Zerthanada jas dırektorlardyń menedjerlik mektebi jumys jasaıdy. Sonymen birge, Almaty qalalyq dırektorlar keńesi de jumys istep tur. Sonyń aıasynda Almaty qalalyq bilim berý júıesiniń damý tujyrymdamasy, damý baǵdarlamasy, olardy júzege asyrýdyń josparlary daıyndalyp otyrady», – dedi Almaty qalasy Bilim berýdegi jańa tehnologıalar ǵylymı-ádistemelik ortalyǵynyń bólim basshysy Ákimjan Saılybaev.
