Almatyda 400-ge jýyq avtobýs júrgizýshisine jańa úlgidegi forma berildi. Qoǵamdyq kólik tizginshilerine taratylǵan jańa kók tústi ekıpırovka jyldyń tórt mezgiline saı tigilgen. Iaǵnı, júrgizýshiler qysta qalyń ári jyly kúrteshe kıse, jazda jeńil fýtbolkamen júredi.
Bastapqyda dızaınerler qoǵamdyq kólik júrgizýshilerine mynadaı ashyq, kógildir tústi forma usynǵan eken. Alaıda, avtobýs júrgizýshileriniń deni egde jasta bolǵandyqtan, bul tústik gammany unatpaı bas tartqan. Sondyqtan dızaınerler avtobýs júrgizýshileriniń kıimin klasıkalyq úlgide tańdap, túsin qoıý kók tústi etip jasaǵan.
Budan bylaı Almatynyń barsha qoǵamdyq kólik júrgizýshileri kók tústi forma kıip, jolaýshylarǵa qyzmet kórsetedi. Jazda olarǵa fýtbolka men kepka jarasymdy bolsa, kóktem-kúzde jyly jılet yńǵaıly bolmaq. Al qys mezgiline arnalyp maqtadan toqylǵan jempir men shalbar tigilgen. Sondaı-aq, jelden qorǵap, sý ótkizbeıtin kúrte berilipti.
«Kıimder jınaǵynyń ishinde qystyq kúrte qarastyrylǵan. Úsh qabatty sınteponnan tigilgen bul kıim qaqaǵan aıazda óte jyly jáne qozǵalys kezinde júrgizýshige kedergi keltirmeıdi. İshinen maqtadan tigilgen jempir kıedi», – deıdi tigin fabrıkasynyń dırektory Arman Jylqybaev.
Jańa formany ázirleý qazaqstandyq tigin fabrıkasyna tapsyrylǵan. Tiginshiler qazir kún-tún demeı, avtobýs júrgizýshileriniń kıimderin daıyndap jatyr. Olar alǵash bolyp tapsyrys bergen avtoparkterge 400 júrgizýshiniń formasyn birer kúnde ótkizýi tıis. Komplekttegi ár kıimde Almaty qalasynyń logotıpi beınelengen. Al myjylmaıtyn tózimdi matasy shetelden jetkizilipti. Jańa formany qazirdiń ózinde qaladaǵy birqatar avtobýs júrgizýshileri kıip úlgergen. 35 jyldan beri qoǵamdyq kólik tizgindep kele jatqan Nurdáýlet Túndebav buryn-sońdy mundaı yńǵaıly forma kımegenin aıtady.
«Mundaı kıim buryn-sońdy kıgen joqpyz. Qysqy kıimimiz óte yńǵaıly, jyly. Jazda jazdyq kıimderin beredi. Rólde otyrǵanda da yńǵaıly kıimimiz. Birtústi kıimmen júrgen bizdiń ózimizge de yńǵaıly, ádemi kórinedi», – deıdi qoǵamdyq kólik júrgizýshisi Nurdáýlet Túndebaev.
Júrgizýshiler jańa ekıpırovkanyń yńǵaıly ári sapaly ekenine dán rıza. Eń bastysy, qozǵalysqa kedergi keltirmeıtinin alǵa tartýda. Aıta ketsek, olarǵa biryńǵaı úlgide kıim berý týraly sheshim arnaıy júrgizilgen saýalnama nátıjesinde qabyldanǵan. Saýalnamada tizginshilerdiń deni ózderiniń qazirgi kıimderi yńǵaısyz ekenin aıtyp, sıntetıka emes, maqtadan tigilgen kıim suraǵan.
«Qazir 400 júrgizýshige arnap kıim tiktik. Almaty qalasynda jalpy sany 2900 qoǵamdyq kólik júrgizýshisi qyzmet etedi. Olardyń barlyǵyn aldaǵy 2 aıda jańa formamen qamtamasyz etemiz», – dedi Almaty qalasy Tasymaldaýshylar qaýymdastyǵynyń tóraǵasy Dana Ahatova.
Bir júrgizýshiniń kıimder jınaǵy 37 myń teńge turady. Forma júrgizýshilerge tegin beriledi, aqysyn ár avtopark óz moınyna alady.
