Polıseıler halyqqa birtaban jaqyndaı tústi. Almatyda kelesi jyly senbi men jeksenbi kúni de jumys isteıtin 12 ilgeri-keńse ashylady.
Budan bylaı turǵyndar tártip saqshylaryna tez arada aryz-shaǵymdaryn tastap, oǵan qosa, quqyqtyq kómek te ala alady. Front-keńseler qalaı jumys isteıdi? Qazir qaı aýdanda qurylysy bastaldy?
Almatyda 2 aıdan beri Jetisý aýdandyq polısıa basqarmasy tekserý pýnktiniń ishin keńeıtip, kishigirim front-keńse ashty. Bul jańasy salynǵan deıin ýaqytsha jumys isteıdi deıdi quzyrlylar. Óıtkeni, ıgi bastamanyń nátıjeli ekenin baıqaǵan tártip saqshylary tájirıbeni qazirden bastap engizýdi jón kórgen. Jumys isteý tártibi ońaı. Aryzdanýshy kelgen boıda keńesshi kabınetterge sabyltpaı birden esikten qarsy alady. Kerektisin taýyp berip, ýaqyt shyǵyndamastan jumysyn bitirýge septesedi. Keńesshiniń qyzmetine kúnine shamamen, 50 shaqty adam júginedi eken.
«Jumysymyz burynǵyǵa qaraǵanda qazir anaǵurlym ilgerileı tústi. Qazir aryzdanýshylardy jaqsy qarsy alamyz. Eshqandaı kezek kútý degen bolmaıdy. Kelgen kisiler ishke qaraı kirip kete alady. Baqylaý-ótkizý beketi buryn shaǵyn edi. 2-3 adam kelse, bul jerde aınalatyn oryn qalmaıtyn. Qazir ony keńeıtip, kelgen kisilerge barynsha qolaıly múmkindik jasap jatyrmyz», – dedi Almaty qalasy Jetisý aýdandyq polısıa basqarmasy kezekshi bóliminiń basshysy Murat Dáýrenbekov.
Jetisý aýdandyq polısıa basqarmasy janyndaǵy front-keńse tańǵy saǵat 8:00-den ashylyp, keshki 20:00-ge deıin jumys isteıdi. Tipti, aptanyń senbi men jeksenbi kúnine de qaramaıdy. Al kelesi jyly halyq úshin budan da jaıly jaǵdaı jasalmaq. Jańa nysanda kútý zaly qarastyrylyp, qylmystyq jáne ákimshilik polısıa qyzmetkerleri, sondaı-aq zańgerler keńes beredi.
«Meniń jol kólik apatyna qatysty máselem boldy. Polısıa basqarmasyna kelgende keńesshi qarsy alyp, birden qaıda barý, ne isteý kerektigin tizip aıtyp berdi. Bul strategıalyq nysan bolǵandyqtan, kirý qıyndyq týǵyzady. Kez kelgendi kirgize bermeıdi. Degenmen, búgin kerekti kabınetti tez taýyp, jumysymdy az ýaqytta tyndyrdym. Áınek front-keńse salynady degendi estigenmin. Jaqsy bolar edi», – dedi İlıas Qasenbaev.
Qazir Túrksib aýdandyq polısıa basqarmasyna qatysty front-keńseniń qurylysy qarqyndy júrgizilýde. Zamanaýı úlgide salynatyn nysannyń árqaısysy shamamen, 65 sharshy metrdi quramaq. Al jemqorlyqty azaıtý maqsatynda syrty tózimdi ǵana emes, sondaı-aq, bárin syrttaı kedergisiz baqylaýǵa bolatyn áınekten jasalady.
Keler jyly adam¬dar¬dy áýre-sarsańǵa salmaı, muń-muqta¬jyn bir jerden sheshý úshin jalpy sany 12 front keńse salynbaq. Ol úshin 300 mıllıon teńgeden astam qarjy bólingen. Aıta keteıik, bir tereze qaǵıdasy negizinde jumys isteıtin nysan aýdandyq basqarmalarda bir tıpte salynady. Onyń eni 6 metr, al uzyndyǵy 11 metrdi quraıtyn bolady.
