Almatynyń barlyq ustazdary kásibı biliktilikterin arttyrý úshin qaıta daıarlyq kýrsynan ótedi.

Búgin qala ákimdigi men «Nazarbaev zıatkerlik mektepteri» ekijaqty memorandýmǵa qol qoıdy. Qujatqa sáıkes, shahardaǵy jalpy bilim beretin mektepterdiń muǵalimderi bilim jetildiredi. Ustazdar ınovasıalyq bilim boıynsha kásibı deńgeıdi arttyrady. 127 kýrstan turatyn dáris barlyq pedagogty qamtıdy. Iaǵnı, bastaýysh synypqa sabaq beretin ustazdan bastap, dırektorǵa deıin qaıta saýat ashpaq. Mańyzdy qujatqa qol qoıǵan qala ákimi Baýyrjan Baıbek ustazdardyń biliktiligin arttyrý bilim sapasyn kóterýge septesetinin qadap aıtty.

«Almaty qalasy mektepteriniń 74,3 paıyz oqýshylary Nazarbaev zıatkerlik mektepteriniń oqytý júıesi boıynsha bilim alýda. Al 2020 jyly barlyq mekteptegi oqýshylar 100 paıyzǵa jańartylǵan bilim mazmunyna kóshetin bolady. Endi bizdiń ustazdarǵa keletin bolsaq, eń bastysy, árbir ustaz sabaqty jańasha ótkizse, ony reforma dep sanaýǵa bolady», – dedi Almaty qalasynyń ákimi Baýyrjan Baıbek.

Ustazdar qaýymy daıarlyq kýrstarynda jańartylǵan bilim mazmunyn ǵana meńgerip qoımaıdy. Ujymda jumys isteý joldaryn, oqýshylardy zertteý jáne ata-anamen til tabysýdyń da qyr-syryn meńgeretin kórinedi. Sondaı-aq, ǵalamtordan sabaqqa qoldanýǵa bolatyn paıdaly materıal izdeýdi de úırenedi. Aıta ketsek, muǵalimderdi «Nazarbaev zıatkerlik mektepterinde» dáris beretinder men arnaıy trenerler oqytady.

«Birinshiden, qarapaıym mekteptiń muǵalimi jańartylǵan bilim mazmunyn qaıtadan meńgerip shyǵady. Ekinshiden, jańa metodıka men tehnologıalardy qaraıdy. Óziniń praktıkasyn zertteýdi úırenedi. Jalpy, jańartylǵan jańa baǵalaý júıesimen tanysady. Jáne biz qazir osy jańartylǵan jańa baǵalaý júıesine baılanysty esepter daıyndaý, suraqtar, tapsyrmalardy daıyndaýdy úıretemiz. Jalpy, muǵalimder qaıta daıarlyq kýrsynan ótken kezde tek leksıa tyńdap qana qoımaı, barlyǵy birigip sabaq josparyn daıyndaıdy», – dedi «Nazarbaev zıatkerlik mektepteri» derbes bilim berý uıymynyń basqarma tóraıymy Kúlásh Shamshıdınova.