Búgin Almatyda, Rysqulov pen Saın kósheleriniń qıylysynda opyrylyp túsken, qurylysy áli aıaqtalmaǵan kópir osyǵan deıin birneshe márte tragedıalyq oqıǵalardyń ortasynda bolǵan.
2014 jyldyń qańtarynda álde bir qurylys qyzmetkeri «QazPromTransProekt» kompanıasy ázirlegen kópirdiń negizgi ınjınerlik plan-sqemasyn taksıde joǵaltyp alǵan edi.
Al ótken jyldyń sáýir aıynda dál osy qurylys alańynda 26 jasar jigit topyraq astynda qalyp, kóz jumǵan bolatyn. Keıin anyqtalǵandaı, qaza tapqan jigit «AlmatyTehnoServıs LTD» merdiger kompanıanyń jumysshysy bolǵan.
Endi, mine aıqaı-shýy kóp kópir qańqasynyń ózi bel ortasynan opyrylyp tústi.
Belgili bolǵandaı oqıǵa kezinde qurylys nysanynda 55 adamdyq brıgada jumys jasap jatqan. Bastapqyda 8 adam jaralanyp, taǵy 2 adam úıindi astynda qaldy degen aqparat aıtylǵan. Keıin, kópir qıraǵan ýaqytta jaraqat alǵandardyń sany 20-ǵa artqan. Ázirge, zardap shekkender men qırandy astynda qalǵandar týraly naqty derekter keltirilmegen. Al qutqarýshylar qırandy astynda qalǵandardy arnaıy izkesýshi ıtter arqyly izdestirýde.
Sondaı-aq, belgili bolǵany qurysqa tapsyrys berýshi jáne jaýapty - Almaty qalalyq ákimshili men burynǵy transport jáne komýnıkasıa, qazirgi QR ınvestısıa jáne damý mınıstrligi bolǵan. Qurylys nysany respýblıkalyq búdjetten transferlik jolmen qarjylandyryp otyrǵan jáne ony QR Qarjy mınıstrligi baqylaýda ustaǵan. Atalmysh aınalma kópirdiń qurylysyna bólingen qarjy bastapqyda 10,5 mlrd. teńgeni quraǵan. Jospar boıynsha kópir 2018 jyly paıdalanýǵa berilýi tıis bolǵan. Al qurylysqa jaýapty qazirgi merdiger kompanıa - «Bazıs A».
Keıbir sarapshylardyń pikirinshe, kópir qurylysyndaǵy apat - uıymdastyrýshylardyń qateliginen bolyp otyr. Qurylystyń joǵarǵy bóliginde aýyr tehnıkalar men mólsherlengen salmaqtan birneshe ese aýyr materıaldar tóselgen. Sondaı-aq, joǵarǵy bólikke shyǵarylatyn betondy qalypty jaǵdaıda kezeń-kezeńge bólip quıýy kerek. Iaǵnı, aldymen bir bóligin, sosyn ekinshi bóligin quıyp, ortasyndaǵy sheldi (bos jerdi) arnaıy biriktirýshi materıal arqyly jalǵanýy tıis bolǵan. Al áleýmettik jelilerge taralǵan beıne-rolıkter men sýretterde qurylys alańynda armatýralar men kóterýshi temirler bos jatqan. Qurylystyń joǵarǵy bóligindegi salmaqtyń tym aýyrlyǵynan tómengi bólik (tireýshi temirler) opyrylǵan.
Sonymen qatar, áleýmettik jelilerde kópirdiń qulaýyna qatysty taǵy bir beıresmı boljam aıtylýda. Onda, beton aralastyrýshy júk kóligi kelip, qurylystyń qańqasyna soǵylǵan. Saldarynan kópir ortasyna túsken. Alaıda, aınalma kópirdiń qıraýyna qatysty resmı oryndar áli naqty derekter aıtpaǵan.
Qazir oqıǵa ornynda arnaıy qutqarý qyzmeti men birneshe jedel-járdem qyzmetkerleri úzdiksiz jumys isteýde.
Nurzat Toǵjan
