Jýrnalıs, shyǵystanýshy Ǵalym Boqash otbasylyq jaǵdaıy ári qyzmet babyna baılanysty AQSH-qa qonys aýdardy. Bul týraly ǵalym óziniń Facebook-tegi paraqshasynda jarıalady. Jazbasy tómendegideı:
"Qadirli Facebook-taǵy aǵaıyn, dos-jar, kóz tanys hám sóz tanys jámıǵat!
Bala kezimnen jıi estıtin "Adamnyń basy - Allanyń doby" deıtin maqaldyń maǵynasyn sońǵy jıyrma shaqty jyl ishinde ábden uqqandaı boldym. Sovet Odaǵynyń Qazaq SSR-iniń Semeı oblysyna arǵy betten kóship kelgen eki úlken áýlettiń ortasynan shyqqan, sol zamannyń ózinde orys tilin engizý saıasaty sińbeı, is júrgizý qazaqsha bolǵan dástúrli aýylda ósken Qarabulaqtyń qara domalaq balasy edim. Bes jasymnan qazaqsha árip tanyp alyp, bas almaı kitap oqydym. Batyrlar jyrynan bastap, qazaq-sovet klasıkterine bir-aq tústim. Alakólde qulashtap júzgendeı áserge bólendim. Jeti jasymnan oryssha úırenip, aq-qara tústi televızorymyzdy kórýge kelgen kórshi-qolań úshin tárjimeshige aınaldym hám "Kúmis ǵasyrdyń" ǵajaıyptaryn, Batys ádebıetiniń orys tiline aýdarylǵan keıbir jaýharlaryn tanı bastadym. Kaspııge qaıyqpen shyqqandaı boldym. Qazaqstan táýelsizdik alyp, keýdemiz keńip, jolymyz uzaryp, armandaǵan Almatyma jetip, qıalymdaǵy QazUÝ-diń shyǵystanýyna túsip, ýrdý men hındıge den qoıǵanda Parsy men Bengal shyǵanaǵy hám Arab teńizin aınalyp shyqqandaı tań-tamasha qaldym. Keıin Ulybrıtanıaǵa sapar shegip, álemniń úzdik ýnıversıteti Oksfordta oqyǵanymda, akademıalyq bostandyq prınsıpterimen jazylǵan zertteýlerdi, shyǵarmashylyq erkindik rýhynda jazylǵan kórkem týyndylardy kúni-túni paraqtaǵanda telegeı teńiz, sheksiz muhıtqa kememen shyqqandaı kúı keshtim.
Oqyǵan-toqyǵanymdy Qazaqstanda qyzmette júrgenimde kóptiń paıdasyna jaratýǵa tyrystym. Sońǵy segiz jyl, segiz aı Pragadaǵy halyqaralyq medıa kompanıada áriptesterime tájirıbem men bilimimdi usynyp, ózim de jańadan kóp dúnıe úırenip, elde sóz bostandyǵyn hám mýltımedıa jýrnalısıka úlgilerin nasıhattaý úshin biraz kúsh saldym. Endi otbasymnyń jaǵdaıy, bolashaq zertteý jumysy men qyzmet yńǵaıyna oraı AQSH-qa qonys aýdaryp bara jatyrmyn. Burylyp sońyma kóz salsam, baǵyp-qaqqan áke-sheshemniń, quldyrańdap qasymda ósken qaryndasymnyń, Táńir taǵala úzeńgi joldas qylǵan nebir jaqsy men jaısańnyń júzin kórem, demeýin sezem, duǵa-tilegin estımin. Dúnıeden ozǵandaryn duǵamnan qaldyrmaımyn. Sońǵy birneshe apta boıy qımaı qoshtasyp, júrekjardy sózderin aıtyp jatqan Astana, Almaty men Pragadaǵy áriptesterime alǵysym zor, qurmetim erekshe. Jaqsylyqqa hám jaryqqa umtylýyma sebep bolǵan osyndaı bir týmasa da, jany týys bolyp ketken jaqsy hám jaryq jandar ekenin bilem, umytpaımyn, qadir tutam, sheksiz súıem. Qudaı qosqan jarymnyń kóńilin bútin etip, qos qyzymnyń bilimin ushtap, densaýlyǵyn saqaıtý úshin osyndaı sheshim qylýǵa týra keldi. Qaıda júrsem de, qazaq tilindegi aqparat pen mádenı keńistiktiń ajyramas bólshegi bolyp qala beretinim, sol keńistikti damytýǵa jáne keńeıtýge úles qosa beretinim anyq. Aldaǵy aptadan bastap áleýmettik jelilerge kirýim sırep ketedi. Sol sebepti hat-habar úshin galym.bokash@gmail.com degen jeke poshtam bar ekenin eskertem.
Jańa jyldaryńyz qutty, baqty-berekeli bolsyn!
Barshańyzǵa degen izgi tilekpen,
Ǵalym Boqash"
Aıta keteıik, 2017 jyly Qamshy.kz aqparat agenttiginiń uıymdastyrýymen ótken Alashtyń 100 jyldyq toıynda Alash arystarynyń izbasarlary arnaıy medalmen marapattalǵan edi. Halyqtyń ınternette daýys berýi arqyly júzdikke kirgen tulǵalardyń biri - Ǵalym Boqash.
Qazaq úshin eńbek etken ór tulǵaǵa Qamshy.kz aqparat agenttiginiń ujymy "Sát sapar" tileıdi!
