Elbasynyń «Bolashaqqa baǵdar: rýhanı jańǵyrý» memlekettik baǵdarlamasy aıasynda Almaty qalasynyń ákimdigi İshki saıasat basqarmasy uıymdastyrǵan «Tulpar minip, tý alǵan» baıqaýy shyn máninde ulttyq rýhanıatymyz ben qundylyqtarymyzdy ulyqtaǵan, qoǵamdyq sanany oıatqan tyń úrdis boldy.
Almaty qalasy ákimdiginiń bastamasymen bıylǵy jyldyń mamyr-qyrkúıek aılary aralyǵynda jalpy bilim beretin mektepterdiń, lıseıler men gımnazıalardyń oqýshylary arasynda Alpamys batyr jyryn jatqa aıtýdan ótken ádebı jáne tarıhı-tanymdyq bul shara eń aldymen jalpyhalyqtyq sıpat alýymen este qaldy.
Baıqaýdyń nátıjeleri kóz súısindiredi. Oǵan qatysý úshin qala mektepteriniń 6-10 synyp oqýshylarynyń arasynan 1300 bala ótinim berip, onyń 1000-nan astamy dúbirli dodaǵa túsipti. Erekshe atap ótetin jaǵdaı, Alpamys batyr jyryn jattaǵan oqýshylardyń 50-den astamy ózge ult ókilderi eken. Báıgege qatysýshylar arasynan ońtústik megapolıstiń 8 aýdanynan úsh-úshten iriktelip shyqqan 24 oqýshy baıqaýdyń qalalyq kezeńinde baq synasty. 110 betten turatyn «Alpamys batyr» jyryn jatqa aıtqan oqýshylar arasynda orys ta, uıǵyr men koreı etnostarynyń ókilderi de bolǵan eken. Tipti, Naýryzbaı aýdanynan kelgen Nıkolaı Shýt jyrdy jatqa aıtyp, tyńdarmandaryn tánti etti.
Aıshyqty sharanyń qorytyndysy boıynsha baıqaýdyń úsh jeńimpazy da Almaty qalasynyń Alataý aýdanynan shyqty. Júzden júırik, myńnan tulpar shyqqan I oryn ıegeri Arýjan Ábsattarǵa 1 500 000 teńge, II oryn ıegeri Abylaı Berdashevqa 1 000 000 teńge jáne III oryn ıelengen Bekzat Shardarbekke 500 000teńge qarjylaı júlde qory tabys etildi. Sarapshylardyń aıtýynsha, osyndaı kólemdegi qomaqty júlde qory buǵan deıin bilim salasyna qatysty baıqaýlarda bolǵan emes.
Sonymen qatar, shákirt daıyndap, oqýshylary júldeger atanǵan tálimger-ustazdar Maıra Aıyphanqyzyna, Farıda Súleımenovaǵa, Aıjan Ospanbekovaǵa Oksford (Anglıa) ýnıversıtetindegi Til bilimin jetildirý ortalyǵynda 1-3 aı merzimge aǵylshyn tilin oqyp úırenýi úshin sertıfıkattar berildi.
El ishinde erekshe qoldaýǵa ıe bolǵan jobanyń ádilqazylar alqasyna akademıkter Ómirzaq Aıtbaev pen Ýálıhan Qalıjannyń, ádebıetshi-ǵalymdar Tynysbek Qońyratbaevtyń, Temirhan Tebegenovtiń, Serik Qorabaıulynyń, belgili qalamger Qalı Sársenbaıdyń tórelik etýinen-aq bul sharanyń bıik deńgeıin baǵamdaýǵa, mazmun-maǵynasyn saralap-salmaqtaýǵa bolar.
«Rýhanı jańǵyrý» memlekettik baǵdarlamasymen úndese, úılese, qoǵamdyq sanany selt etkizgen bul ulttyq joba rasynda da rýhanı salaǵa jańa lep, úlken serpilis ákelgen shara boldy. Oqýshylar arasynda kitap
oqýdy, onyń ishinde qazaq halqynyń batyrlyq epostaryn nasıhattaı otyryp, olardyń kórkem ádebıetke degen qyzyǵýshylyǵyn oıatýdy, jasóspirim býyndy halyq poezıasyna degen ińkárlikke jáne patrıotızmge tárbıeleýdi maqsat etken joba respýblıka jurtshylyǵynyń da kóńilinen shyqqanyn baǵamdadyq. Baıqaýdyń jáne bir ereksheligi, synaq barysynda «Alpamys batyr» jyryn balalarmen birge olardyń ata-analary da jatqa aıtyp, kózge tústi. Lezdemde respýblıka óńirlerine taralyp ketken bul rýhanı báıgege zıaly qaýym ókilderi, óner juldyzdary qoldaý kórsetip, áleýmettik jelilerde el-jurttyń kóńilinen shyqqan jyr jarysyn uıymdastyrdy.
Tanymal tulǵalar «Tulpar minip, tý alǵan» ulttyq jobasy boıynsha kúlli túrki halyqtaryna ortaq «Alpamys batyr» jyrynan úzindiler oqyp, ony bir-birine joldap, estafetaǵa tipti mınıstrler men oblys ákimderi, depýtattar, memlekettik qyzmetshiler jáne qoǵamnyń ózge de salalarynyń ókilderi, jalpy sany 270-ten astam adam qatysty.
Toqsan aýyz sózdiń tobyqtaı túıini - «Tulpar minip tý alǵan» jobasy balalardy halyq poezıasyna, jalpy kitap oqýǵa baýlýdyń, qazaq halqynyń ulttyq qundylyqtary men asyl muralaryn,batyrlyq epostaryn nasıhattaý arqyly qaısarlyq qasıetterdi, ulttyq kodqa negizdelgen namysshyldyqty, ulttyq sezimdi oıatýdyń, oqýshylardyń shyǵarmashylyq qabiletin damytýdyń, jas urpaqty memleketshildikke, patrıotızmge tárbıeleýdiń ónegeli mektebin qalyptastyrdy dep batyl aıta alamyz.
Baıqaýdyń taǵy bir taǵylymdyq qyry bar, eger qala ákimdigi ony ótkizýdi dástúrge aınaldyrsa, halqymyzdyń mádenı urasyn jańǵyrtyp, ulttyq kodymyzdy saqtaýdyń, ulttyq qundylyqtarymyzdy ulyqtaýdyń jańa bıigine kóterilerimiz haq.
«Tulpar minip, tý alǵan» ulttyq jobasynyń basty qurmet- qundylyǵy da osy bolmaq.
