Búgin QR Prezıdenti Ákimshiliginiń basshysy Áset Isekeshev elimizdiń Syrtqy ister mınıstrligi ujymyna vedomstvonyń jańa basshysyn tanystyrdy. Bul laýazymdy qyzmetke Beıbit Bákiruly Atamqulov keldi, dep habarlaıdy Qamshy.kz aqparat agenttigi QazAqparatqa silteme jasap.
«Beıbit Bákiruly Atamqulov QR Syrtqy ister mınıstri bolyp taǵaıyndalsyn», - delingen Áset Isekeshev jarıa etken Elbasynyń Jarlyǵynda.
Osydan keıin sóz alǵan Qaırat Ábdirahmanov QR Syrtqy ister mınıstrligine udaıy qamqorlyq kórsetip kele jatqan Memleket basshysyna rızashylyǵyn bildirdi.
«Elbasynyń arqasynda osy kúnderi bizdiń memleketimiz tarıhı ólshemde jáne tarıhı turǵydan alǵanda óte qysqa merzimde halyqaralyq arenada da eleýli nátıjege jetip otyr», - dep atap ótken ol ornyna kelgen Beıbit Bákirulyna aldaǵy jumystaryna tabys tiledi.
Beıbit Bákiruly 1964 jyly týǵan. Qazaq polıtehnıkalyq ınstıtýtyn, Sankt-Peterbor memlekettik ekonomıka jáne qarjy ýnıversıtetin bitirgen. Ekonomıka ǵylymdarynyń kandıdaty.
Eńbek jolyn Norılsk taý-ken metalýrgıa kombınatynyń mys qorytatyn zaýytynda balqytýshy bolyp bastady, 1985-1991 jyldary Shymkent qorǵasyn zaýytynda metal balqytýshy, aýysym sheberi, ınjener-tehnolog, jetekshi ınjener bolyp jumys istedi.
1991-2006 jyldar aralyǵynda komersıalyq qurylymdarda basshylyq qyzmetter atqardy.
2006-2012 jyldary dıplomatıalyq qyzmette boldy. Qazaqstan Respýblıkasynyń Malaızıadaǵy Tótenshe jáne ókiletti elshisi, Qazaqstan Respýblıkasynyń Indonezıa Respýblıkasyndaǵy, Brýneı-Darýssalamdaǵy, Fılıppın Respýblıkasyndaǵy Tótenshe jáne ókiletti elshisi mindetin qosa atqarýshy bolyp taǵaıyndalǵan.
2012 jylǵy qazannan Qazaqstan Respýblıkasy Indýstrıa jáne jańa tehnologıalar mınıstrliginiń jaýapty hatshysy, 2014 jylǵy tamyzdan Qazaqstan Respýblıkasy Investısıalar jáne damý mınıstrliginiń jaýapty hatshysy bolǵan.
Ońtústik Qazaqstan oblysynyń ákimi, Qazaqstan Respýblıkasynyń Qorǵanys jáne aeroǵarysh ónerkásibi mınıstri bolǵan.
Aıta keteıik, Memleket basshysynyń Jarlyǵymen Qaırat Qudaıbergenuly Ábdirahmanov basqa jumysqa aýysýyna baılanysty Qazaqstan Respýblıkasynyń Syrtqy ister mınıstri qyzmetinen bosatyldy.
