Almaty qalasy Pedıatrıa jáne balalar hırýrgıasy ǵylymı ortalyǵynda «Densaýlyq saqtaý salasyndaǵy klınıkalyq zertteýlerdiń róli» atty brıfıń ótti, dep habarlaıdy Qamshy.kz aqparat agenttigi.
Jıyn QR Parlamenti Senatynyń 25 jeltoqsanda qabyldaǵan gemofılıa jáne ózge de sırek kezdesetin aýrýlarmen aýyratyn naýqastarǵa klınıkalyq zertteý júrgizý týraly QR Densaýlyq saqtaý mınıstrliginiń zań jobasyn talqylaý-túsindirý maqsatynda uıymdastyryldy. Atalǵan zań jobasy elimizdegi medısınanyń damýymen qosa, farmasevtıka, dıagnostıkalyq zertteýler men sırek kezdesetin aýrýlardy túbegeıli emdeýde mańyzdy ról atqarady- deıdi brıfıń spıkeri S.D. Asfendıarov atyndaǵy QazUMÝ-niń ǵylymı zertteý jumystary boıynsha prorektory Júsipov Baýyrjan Sábıtuly.
«Otandyq farmkompanıalar shetelde zerttelgen jáne tekserilgen preparattardy óndirýmen aınalysady. Degenmen, sheteldikterge oń áser etken dári-dármekterdiń barlyǵy qazaqstandyqtarǵa da dál solaı áser etedi degen sóz emes. Sapaly medısınalyq qyzmet kórsetý men naýqastardyń jaǵdaıyn baqylaýda klınıkalyq zertteý júrgizýdiń mańyzy zor...»-dep túsindirdi Baýyrjan Sábıtuly.
Baspasóz brıfıńine sırek kezdesetin dertke shaldyqqan balalardy qoldaý uıymdarynyń ókilderi arnaıy shaqyrtylǵan. Qazaqstandyq múmkindigi shekteýli jandar men gemofılıaǵa shaldyqqan naýqastar asosıasıasynyń prezıdenti Tamara Rybalova klınıkalyq zertteý júrgizý naýqas balalardyń ómirin saqtap qalýda mańyzdy ekendigin atap ótti: «Elimizde gemofılıanyń aýyr túrine shaldyqqan 40-tan asa balalar men 15-ke jýyq eresekter bar. Mundaı túrimen aýyratyn balalar tek bizdiń elde ǵana týylady. Oǵan basty sebep, ekologıalyq máseleler bolýy múmkin. Máselen, alty jasar Radamır Shagabýdınov týǵanynan bastap ár kún saıyn óte aýqymdy dozada em qabyldap keldi. Biraq, bala densaýlyǵy ońalmady. Ata-anasy Reseıde emdetýge sheshim qabyldaǵan bolatyn. Reseıde gemofılıaǵa shaldyqqan 84 myń naýqastyń ishinde dál Radamırdiń sımptomdary múlde kezdespedi. Klınıkalyq zertteýge qatysyp, jańa preparatty synaqtan ótkizdi. Radamır úshin shyǵarylǵan dáriler onyń densaýlyǵyna oń áser etip, búginde basqa balalarmen qatar mektepke bardy. Onyń emine jyl saıyn mıllıondaǵan qarjy ketip, kún saıyn óte kóp mólsherde dári qabyldaý tıimsiz bolǵany anyq. Al, qazir klınıkalyq zertteýden sátti ótken preparattyń arqasynda tek aptasyna 3 ret qana doza qabyldaıdy. Klınıkalyq zertteý júrgizý ádisteri elimizde ekonomıkalyq jaǵynan da asa tıimdi bolmaq»,-deıdi Tamara Rybalova.
Jıyn barysynda mamandar otandyq farmasevtıkany damytý men preparattar oılap tabý qajettiligi de sóz boldy. Sebebi, kez kelgen preparattyń keri áseri bolýy múmkin. Ásirese shetelde shyǵarylatyn nemese basqa memleketterde synaqtan oń nátıje kórsetken dárilerdiń ózge aımaqtarda keri áser etýi ǵajap emes. Qazaqstan ekologıalyq, geografıalyq turǵydan alǵanda densaýlyq kórsetkishi tómen elge jatady. Genetıkalyq nysanda da áldeqaıda aıryqsha belgiler bar. Sondyqtan otandyq dári óndirisi men ony qazaqstandyqtar aǵzasyna áserin bilý úshin klınıkalyq zertteýler júrgizý medısınany damytýda, sapaly medısınalyq qyzmet kórsetýde mańyzdy ekenin atap ótti. Qoǵamda ár alýan pikir týdyrǵan Zań jobasyn halyqqa durys jaǵynan túsindirý kerektigin, azamattardyń klınıkalyq zertteýge qatysýshylar synama obektisi bolady degen jańsaq pikiriniń orynsyz ekenin de eskertti.
