Qazaqstan prezıdenti Nursultan Nazarbaev Qytaıdan eshqandaı qaýip tónip turǵan joq dep sanaıdy. Bul týraly memleket basshysy jyl qorytyndysy boıynsha BAQ ókilderimen ótken kezdesýinde aıtty, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp.
Prezıdent Qazaqstan men Qytaıdyń qazirgi qarym-qatynasy joǵary deńgeıde ekenin atap ótti.
"Odan qorqatyn eshnárse joq. Bul dúnıe, tarıh bizden bastalǵan joq, bizben aıaqtalmaıdy…Qytaılar qaptap, elimizdi basyp jatqan joq. Men sony baqylamaı, osy jerde ne qarap otyrmyn?! Onyń barlyǵy zańmen, kelissózben kelisilgen. Óndiris salatyn bolsa, bizde joq 500 maman tizim boıynsha keledi. Zaýyt qurylysy aıaqtalǵannan keıin, sol 500 adam eline qaıtady. Ol kelisilgen másele", — dedi Nazarbaev jyl qorytyndysy boıynsha jýrnalısermen ótken kezdesýinde.
Memleket basshysy 200 mıllıonnan astam qytaı basqa elderde turatynyn mysalǵa keltirdi. Qaı qalaǵa bara qalsań, qytaı qalashyǵy aldyńnan shyǵady. Al bizde ondaı eshteńe joq dedi ol.
"Týystary bolatyn shyǵar, úılenetin shyǵar, ne isteısiń, bul endi ómir ǵoı. Sondyqtan qazir Qytaı Amerıkadan keıingi álemdegi ekinshi orynda turǵan, óte myqty, órkendep-ósip bara jatqan el. Tehnologıa men tehnıka jaǵynan birge kele jatyr. Aqparattyq tehnologıa, jasandy ıntellekt, kompúterlik tehnologıa – barlyq jaǵynan Qytaı ozyp ketpese, artta qalyp jatqan joq", — dedi prezıdent.
Nazarbaev Qytaı, Reseı sekildi kórshi eldermen qarym-qatynas jasaspasaq, Qazaqstan memleket bolmaı qalatynyn aıtty.
"Batysqa kóbinese Reseı arqyly shyǵamyz, shyǵysqa Qytaı arqyly. Al olarmen arada dostyq qarym-qatynas, senim bolmasa, Qazaqstan damymaı, birden joq bolyp ketedi. Sondyqtan biz qoldan kelgenshe Sı Szınpın myrzanyń "Bir beldeý – bir jol" (Jibek joly) degen máselesin qoldap otyrmyz. Bizdiń "Nurly jol" batysqa qaraı sol "Jibek jolynyń" jalǵasy bolyp sanalady", — dedi Nazarbaev.
Prezıdent Qytaımen qarym-qatynas bolǵannan keıin, jastardyń qytaı tilin bilýi mańyzdy ekenin atap ótti.
"Jastarymyz aǵylshyn tilinen keıin qytaı tilin meńgerýi tıis. Ashyǵyn aıtqanda, eshqandaı qaýip joq dep sanaımyn. Kerisinshe, jumysymyzdy kúsheıtýimiz kerek. Qytaı da bizdiń olarǵa baryp jumys isteýimizge qarsy bolyp otyrǵan joq. Biraq, biz óz ishimizdi jóndeı almaı otyrǵanda, ol jaqta ne isteımiz? Sondyqtan biz qarym-qatynasty nyǵaıtamyz, kórshilik jaǵdaıymyzdy ári qaraı túzep, ıntegrasıany júrgize beremiz", — dep túıindedi sózin Nazarbaev.
