Sońǵy kezderi áleýmettik jelilerde jalańashtanǵan qyz, jynysy bir uldardyń mahabbaty men atyń shyqpasa jer órteniń kerin qylatyndar qaptap ketti. Biri, qazaq toıynda strıptız bılep, dúıim jurtty "tánimen tánti" etip júrse, endi biri jynys talǵamaıtyn ersi áreketterin jarnamalap júr. Eń soraqylary, qazaq ádebıetiniń, mádenıetiniń altynyn jezge aınaldyryp, Abaıdyń ánin álem aldynda maqaztasa, taǵy biri Qurmanǵazynyń kúıin áıeldiń áýretine balaǵan. Áı deıtin aja, qoı deıtin qojasy joq ınternet osylaısha irigender men shirigenderdiń oınas quratyn ordasyna aınalyp ketkendeı. Osyndaı jaǵa ustatarlyq oqıǵanyń birin keshe Taldyqorǵandyq jastar kórsetti.

Keshe Youtube áleýmettik kanalynda Almaty oblysynyń ortalyǵy, Taldyqorǵan qalasynda ornalasqan Qarakereı Qabanbaı batyrdyń eskertkish músininiń ústine minip, mazaqqa aınaldyrǵan jastardyń vıdeosy paıda boldy. Áleýmettik jelilerde keńinen taralyp úlgermese de, atalmysh vıdeo birqatar qazaqstandyq ınternet qoldanýshylardyń ashýyn týǵyzyp úlgergen.

Vıdeoda baıqańanyńyzdaı, batyrdyń músinin qorlaǵan jastar ózderiniń bul áreketine esh qymsynbaıdy da. Tipti, máz-meıram. Alaıda, áleýmettik jeli qoldanýshylary jastardyń bul áreketterin - halyqtyń has batyryna, tarıhı eskertkishterge, odan qala berdi mádenı muralarǵa degen qurmetsizdik dep qabyldaǵan.

Atalmysh oqıǵaǵa qatysty quqyq qorǵaý oryndaryna áli shaǵym túspegen. Sol sebepten, mádenıetsiz jastardyń úsiten is qozǵalmaǵan, tergeý nemese túsindirý jumystary júrgizilmegen.

Qabanbaı batyr - jońǵar shapqynshylyǵy kezinde qazaq jerin jaýdan azat etip, qazaq handyǵy jolyndy kúresken ult batyry, dańqty qolbasshy, jekpe-jekte jan balasyna ese jibermegen batyr. Qabanbaı "Han batyr" dárejesine deıin kóterilgen.

Al Taldyqorǵandaǵy batyrdyń eskertkish músini 2007 jyly jergilikti "Daraboz" qoǵamdyq qorynyń uıytqy bolýymen turǵyzylǵan bolatyn.

Nurzat Toǵjan