AQSH prezıdentiniń ulttyq máseleler jónindegi keńesshisi Djon Bolton resmı Vashıngton Venesýeladaǵy Madýro bıiligin birjolata qulatý úshin halyqaralyq koalısıa quratynyn málim etti. Bul týraly ol CNN agenttigine bergen suhbatynda aıtty.

Naqty saıası tujyrymǵa  júginsek,  AQSH-tyń jaqtastary «Nıkolas Madýrony «zańsyz saılanǵan prezıdent. Sondyqtan ol ornyn bosatýy tıis. Onyń ornyna opozısıa lıderi Hýan Gýaıdo kelýi tıis. Ol úshin bizdiń koalısıa qoldan kelgenniń bárin jasaıdy. Aldaǵy ýaqytta Madýro rejımine qarsy turatyn koalısıalyq kúshterdiń sanyn kóbeıtemiz. Madýro bıligi ornynan ketýi tıis»,– dep otyr.

Boltonnyń áńgimesine qaraǵanda, shyn máninde olar Nıkolas Madýro bıligin sózsiz ketiretin sıaqty. Olaı bolǵan jaǵdaıda elde azamat soǵysy bastalady. Syrtqy kúshter opozısıaǵa dem beredi. Hýan Gýaıdoǵa kómek kórsetedi. Qazirdiń ózinde AQSH bıligi opozısıa lıderi Gýaıdony qoldap otyr. Al Reseı qaıtpek? Jaǵdaı shıelenisse, senarıdiń qalaı órbıtinin resmı Máskeý ashyq aıtpaı otyr.

Al ózin «ýaqytsha prezıdent» sanaǵan Gýaıdo búginde  shekaralyq el Kolýmbıada  júr. Eger ol elge oralatyn bolsa, Madýro  Gýaıdony tutqyndaýy múmkin. Bul týraly Venesýelanyń resmı bıligi málim etti. Biraq oqıǵanyń qalaı órbıtini áli  belgisiz.  Eger Gýaıdo ustalatyn bolsa, onda Aq úı de qarap qalmaıdy. Al opozısıa basshysy el turǵyndaryn taǵy da Madýro bıligine qarsy kóshege shyǵýǵa shaqyrdy.

Al bılik basyndaǵy prezıdent «Hýan Gýaıdonyń 30 jyl merzimge abaqtyǵa qamalatynyn» málim etti. 

Qalaı aıtqanda da, jaǵdaı barǵan saıyn kúrdelenip barady. Biraq ótken aptada nemistiń Frankfurter Allgemeine basylymy  Madýro bıligin qulatý ońaı emestigin, al Hýan Gýaıdo qazir halyqtyń qoldaýynan aırylyp barady» degen tujyrym jasady.

...Al aldaǵy ýaqytta jaǵdaı qalaı órbıdi, ony endi  ýaqyt kórseter. Biraq Venesýeladaǵy saıası turaqsyzdyqtyń bastalǵanyna bir aı ýaqyt ótse de, Madýro bıligi myzǵymaı turǵany ol endi aqıqat.