«Bizge Asqar Mamın men Baqyt Sultanov kelsin! Aýdan ákiminen qaıran joq». 9 naýryzda tóbesi qulaǵan Astanadaǵy jataqhana turǵyndary osylaı dep yzalanyp otyr. Birneshe jyldan beri jergilikti bılikti jaǵalap, talaı tabaldyryqty tozdyrǵan elordalyqtar endi shydamymyz taýsyldy deıdi. Qansha hat jazyp, máselelerin aıtqanymen osy kúnge naqty sheshim joq. Al jýyrda bolǵan oqıǵadan soń turǵyndar tozyǵy jetken ǵımaratqa kirip-shyǵýǵa qorqady. Bul týraly Qamshy.kz aqparat agenttigi Eýrazıa birinshi arnasyna silteme jasap habarlaıdy.
Oqys oqıǵa 9 naýryzda, kúndiz saǵat 12-den asa bolǵan. Jataqhananyń tórtinshi qabatynyń tusy opyrylyp, dúkenniń tóbesine túsken. Abyroı bolǵanda sol sátte bul jerde eshkim júrmegen. Áıtpese, kirpishtiń astynda qalar ma edi.
"Dalaǵa shyqsam kýsok qulaǵan. Onyń ózi bomba sıaqty. Qaıta balalar júrgen joq sol kezde. Dúken jabyq tur myna, eger ashyq bolsa talaı adam ketetin edi. Halyqty qalaı oılamaıdy, men túsinbeımin. Bizdi qoıshy, jas balalarǵa obal emes pe, bárimiz kirpishtiń astynda qalsaq. Kelsin Úkimettegi Mamıni bar, ákimi bar, kórsin. Týalet anaý, aspan, dala kórinip tur.
Qabyrǵasy opyrylǵaly eki kún ótti. Sol kúni bılik ókilderi, tótenshe jaǵdaı qyzmetiniń mamandary bir kelip ketken. Odan keıin jym-jyrt. Tozyǵy jetken nysannyń ishinde kóretin jeri joq. 4 qabatty ǵımaratqa, ıaǵnı júzden astam páterge bir dárethana. Ol birinshi qabatta. Onyń da sıqy mynaý. Túnde barý tipti qorqynyshty. Sebebi, bomjdar kirip ketedi eken, - dep aıtty jataqhana turǵydy Nursulý Mahatova.
«Týaletin kórip tursyzdar, osynda tańerteń kezekte turamyz. Otyrýǵa qorǵamyz. Tóbemizden tamshy aǵady. Iisin qoramen salystyrýǵa kelmeıdi», - dep nalydy jataqhana turǵyny Azamat Dúısekeev.
Qujat boıynsha ǵımarat 1972 jyly salynǵan dep kórsetilgen. Biraq odan da buryn boıkótergen deıdi baıyrǵy turǵyndar. Avtobýs parkiniń ıeleginde bolǵan. Keıin jekege berilgen. Qazirgi turǵyndardyń 80 paıyzǵa jýyǵy kvartıranttar. Jaǵdaıy joq úı ıeleri ǵana qalǵan. Tóbeden sý sorǵalap, joǵarǵy qabattarǵa jaıylǵan. Qabyrǵalar syz tartyp, elektr symdary toq tartady eken.
«Túnimen uıqy joq. Kúndiz kúlki joq. Shúberekpen syǵyp alamyz. Aǵady da turady. Jylda jóndeý jasaımyz. Taraqandar júr», - deıdi jataqhana turǵyny Gaýhar Ahmetova.
Kenesary 57/1 meken-jaıyndaǵy jataqhana jańadan qurylǵan Baıqońyr aýdanyna qaraıdy. Aýdannyń da, qalanyń da ákimderi bir kelip kórmese de, máselemizdi biledi deıdi. Óıtkeni, turǵyndar talaı ret hat jazǵan, talaı barǵan. 2012 jyldan beri súrilýi tıis nysan áli kúnge jyr bolyp keledi. Jańa Úkimettiń jasaqtalǵanynan habardar jataqhana halqy búgin qala ákimdigine de zor úmitpen barǵan. Biraq, Baqyt Sultanovpen kezdesý baqyty buıyrmaı, saly sýǵa ketti. Astana ákimi orynbasarynyń keńesshisimin degen myna jigit mardymdy eshteńe aıta almady turǵyndarǵa.
-Kórdik biz bárin.
-Kórseńder, jazataıym oqıǵany kútip otyrsyzdar ma?
- Biledi ol kisi. Ol bir kúnde sheshilmeıdi ǵoı.
-Biz tipti aýdan ákiminiń famılıasyn bilmeımiz. Ol birde bir kelip kórgen emes. Qashan bolady jaýap? Bir aı, bir jylǵa sozyla ma?
Ýaqytyn aıta almaımyn.
- Astananyń ákimdigine kelip otyrmyz. Eshqandaı jaýap joq. Sonda kimnen kútemiz.
İshi syz tartyp, sý sorǵalap, syrty opyrylyp jatqan jataqhanaǵa kirýge, turýǵa qorqyp otyrmyz deıdi halyq. Tez arada jergilikti bılik bir sheshim qabyldamasa Úkimet úıi men Parlamentke, sol jaǵalaýǵa baryp bazynamyzdy aıtamyz, - dep ashynyp otyr.
Astananyń qaq ortasy, oń jaǵalaý. Elordanyń ortasynda osyndaı ǵımarat bar degenge eshkim senbeıtin shyǵar. Shydamy taýsylǵan turǵyndar osy Selınogradta týyp ósken Asqar Mamınniń ózi kelip kórmese, kómektespese qala ákimdiginen qaıran joq dep ashynyp otyr.
«Bizge ákimdiktiń ókilderi kerek emes. Jańa Úkimet, qala ákimi Baqyt Sultanov kelsin.Sondaı-aq, Mamın Asqar Uzaqbaıuly. Ol osy jerdi biledi. Sondyqtan bizdi Úkimettiń kelýin talap etemiz».
Usynǵan: Nazerke Labıhan
