Jaqynda ulanǵaıyr jerimizdi, týǵan elimizdi, uly Otanymyzdy jyrlap ótken, halqymyzdyń súıikti aqyny Muqaǵalı Maqataevqa arnalyp, Ulystyń uly kúninen bastalatyn eki jyldyq kúntizbe jaryqqa shyqty.

Kúntizbeni qurastyrýdaǵy maqsat – Elbasymyzdyń bastamasymen qolǵa alynǵan «Rýhanı jańǵyrý» baǵdarlamasy aıasynda, jas býyn ókilderin otanshyldyq rýhqa úndeıtin, elimizdi, týǵan jerimizdi súıýge jeteleıtin, tárbıelik-tanymdyq mán-mańyzy bar aqynnyń shoqtyǵy bıik jyrlaryn, qazaqstandyq qyl qalam sheberleriniń jańa týyndylaryn kúntizbe arqyly jalpy jurtshylyqqa jetkizý.

Aqıyq aqynnyń «Qazaq jeri», «Úsh baqytym», «Qazaqstan», «Altaı-Atyraý» jáne basqa da óleńderi, poemalarymen qatar, belgili sýretshiler J.Qaırambaev, D.Qasymov, B.Búrdesbekovtiń «Abaı», «Qurmanǵazy», «Jambyl», «Muqaǵalı»,  «Tylsym sezim» jáne «Tuńǵuıyq. Balýan Sholaq pen Ǵalıa», t.b. jańa týyndylary da bar.

Sonymen qatar, keıinnen tabylǵan, 1965 jylǵy 13 tamyzda «Qazaq ádebıeti» gazetinde basylǵan, Abaıǵa arnalǵan «Dala danyshpany» óleńi de berilip otyr.

Kúntizbeni óner, til janashyry, «Otyrar aýdanynyń Qurmetti azamaty» Berik Jeldikbaev pen «Dorstroı» JSHB basshysy Murat Tleýlıevtiń birlesken toby shyǵardy. Oǵan Á.Qasteev atyndaǵy Memlekettik óner murajaıy jáne T. Júrgenov atyndaǵy  Qazaq ulttyq óner akademıasynyń kyzmetkerleri de atsalysty.

Jastarǵa úlgi bolar, zamandastarymyzǵa oı saldyrar iske bastamashy bolǵan azamattarǵa rızashylyǵymyzdy bildiremiz.

Nurlan Qalqa