Aljır astanasynyń turǵyndary 82 jastaǵy prezıdent Ábdelazız Býteflıkıdiń otstavkasyn toılaýǵa kóshege shyqty dep jazady Qamshy.kz aqparat agenttigi.
Kúni keshe Aljır prezıdenti besinshi ret prezıdent saılaýyna túspeıtinin málimdegen edi.
♦82 jastaǵy prezıdent saılaýǵa túspeıtinin málimdedi
Jańalyqty estı sala tý ustaǵan halyq qalanyń ortalyq aýdandaryna shyǵyp «Halyq jeńdi! Halyqtyń qolynan keldi!» dep urandatýdy bastap ketti.
10 aqpanda Aljır prezıdenti Ábdelazız Býteflıka sáýirde ótetin saılaýǵa qatysatynyn jarıalaǵan. Onyń jazbasha málimdemesin memlekettik telearnalardyń biri taratty. Osydan keıin elde jastar jappaı narazylyqqa shyǵyp, Býteflıkanyń bılikten ketýin talap etip jatyr. 2 naýryzda myńdaǵan adamnyń narazylyǵyn polısıa kúshpen basýǵa tyrysqan. Polısıamen qaqtyǵysta 180-ge jýyq adam zardap shekken.
Býteflıka buǵan deıin tórt ret saılaýǵa túsip, jeńiske jetken. 2013 jyly ınsýlt alyp, sodan beri jurt aldyna shyqpady. Málimdemelerin eldegi telearnadaǵy telejúrgizýshiler nemese mańaıyndaǵy kómekshileri oqyp júr. Halyqaralyq aqparat agenttikteri Býteflıkanyń qazir Shveısarıada emdelip jatqanyn habarlaǵan. Ol 11 naýryzda Shveısarıadan elge oralǵan. Álemdik aqparat quraldarynyń jazýynsha, alty jyl buryn ınsýlt alǵan Býteflıkanyń júrip-turýy qıyn.
1991 jyly Aljırde ıslamıstik toptar men bılik arasynda azamattyq soǵys bastaldy. Býteflıka bılikke eldegi azamattyq soǵys kezinde, 1999 jyly, keldi. Ol Aljırdegi azamattyq soǵysty toqtatyp, elde beıbitshilik ornatty. Qazir narazylyqqa shyqqandardyń arasynda "prezıdentke qarsy emespiz, ol Aljır úshin kóp is tyndyrdy. Biraq qazir prezıdent bolýǵa densaýlyǵy kelmeıdi" deıtinder de bar.
Usynǵan: Gúlim Jaqan
