Almatyda ánshi, kompozıtor Ushqyn Jamalbektiń "Otyzdyń Ushqyny" atty án jınaǵynyń tusaýkeseri ótti. Orda buzar otyz jasqa tolǵan ánshi "Alashuly" tobynan bólinip shyqqannan keıingi birqatar aldaǵy josparlarymen bólisti dep habarlaıdy Qamshy.kz aqparat agenttigi.
"Men qazaqtyń balasy" dep ándetken Ushqyn Jamalbektiń úni men áýeni basqadan bólek. Óıtkeni, onda erekshe boıaý, ózgege uqsamaıtyn ádemi áýez bar. Qaı ánin tyńdasańyz da, Altaı men Atyraýdyń arasyn, keń qazaqtyń asqaq dalasyn eske salady. Ánderinen muńdy da baıqamaý qıyn emes. 20 jastaǵy jigittiń Qytaı asyp óz atamekenine kelgenine de kóp bola qoıǵan joq. Munda eshbir týysy bolmasa da, Ushqynnyń jalǵyz emes ekenin keshegi keshke jınalǵan qalyń kópshilik dáleldep berdi. Degenmen, týǵannyń aty bólek qoı. Osy keshtiń barysynda ánshi aq júrekti anasyna degen saǵynyshyn bildirip, "múmkin kelesi toıda anammen birge qýanyshty birge bólise jatarmyz" degen tilegin jetkizdi. Ushqynnyń anasy tusaýkeserge qatysa almasa da, vıdeo arqyly óziniń balasyna degen júrekjardy tilegin jetkizdi.
–"Balapanym, ózińe sálem! Búgingi týǵan kúnińmen quttyqtaımyn. Ómir jasyń uzaq bolsyn. Armandaryńa jete ber. Otbasyńa amandyq, denińe saýlyq, jumysyńa sáttilik tileımin. Halqyńa bereriń kóp bolsyn. Budan da bıik shyńdardan kórine ber. Baýyrlaryńmen, balapandaryńmen amandyqpen kezdeseıik. Búgin qýanyshyńa kelip otyrǵan aǵalaryńa, inilerińe, jan-joldastaryńa kópten-kóp alǵysymdy bildiremin." - dep anasy barsha kórermenge sálem joldady.
–12 jyldan beri anamdy ákele almaı jatyrmyn. Endi bir sáti keler. Men jalǵyzbyn, bul jaqta. Biraq osynda otyrǵan búkil qonaqtar, týysym sizdersizder! Munda meniń ne naǵashym, ne ákemniń týysy joq. Búkil óner adamdary – týystarym. Men jalǵyz keldim, Atajurtty ańsap keldim. Dombyramdy qolyma serik etip, ónerimizge berik etip júrmiz,– dedi anasyn atamekenine ákelýdi ańsaǵan ánshi.
Ata-ana men týystaryn kórý úshin Ushqyn olarǵa jylyna eki-úsh ret baryp turatynyn, al aǵaıyn-týmanyń Kúnes degen jerde turatynyn aıtty. Onyń aıtýynsha, eń kóp qazaq sol Kúnesti meken etedi. Onda 160 myń qazaq bar.
–Bar týysymdy ákeletin bolsam, bir aýdannyń halqy jınalady,– dedi Ushqyn Jamalbek.
Kesh barysynda Ushqyn Jamalbek kópshilikke tanys ózindik erekshe áýenderimen qatar, jańa ánderin, jańa beınebaıanyn, sondaı-aq eki jyl daıyndyqtan ótkizgen UGAI production prodúserlik ortalyǵynyń jumysyn tanystyrdy.
Keshte Ushqynnyń jańa ániniń de tusaýy kesildi. Ol Tóreǵalı Tórálimen birge "Taqıa" atty jańa ánin oryndady. Ánshiniń aıtýynsha, bul da bir qazaqtyń ulttyq qundylyǵyn dáripteýge arnalǵan áýen.
Osydan keıin Ushqyn "Erkektiń er bolyp júrýi úıdegi appaq júrekterimizdiń arqasynda ǵoı",– dep "Appaq júregim" atty ánin oryndady, kelinshegimen váls bıledi.
Posmotret etý pýblıkasıý v Instagram30 da orda buzǵan Ushqyn baýyrymnyń týǵan kún keshinen estelikter @ushkyn.zhamalbek_official
Ánshi ónerdegi qadamyna biraz ózgeris engizipti. Ushqynnyń muńdy, ulttyq rýhty kóteretetin ánderin tyńdap úırengen halyq, endi ánshini basqa qyrynan da baıqamaq. Jaqyn ýaqytta UGAI production prodúserlik ortalyǵynyń qoldaýymen "Basymdy qatyrma" atty Ushqynnyń jańa beınebaıany kórermender nazaryna jol tartpaq.
"Otyzdyń Ushqyny" laýlaǵan keshke belgili ánshiler Sáken Maıǵazıev, Ádil Slamhan, Ǵadilbek Janaı, Tóreǵalı Tóráli, Toqtar Serikov syndy óner juldyzdary qatysyp, ózderiniń izgi tilekterin bildirdi.
–Sen óziń bólek ósken bóltiriksiń ǵoı. Óz ormanyńa keldiń. Endi osy dalada iziń qalsyń. Biz óner ólkesinde birge júrgennen keıin bir áke bir shesheden týǵandaı syılasamyz. Biriniń mańdaıyna bir kishkentaı daq, kúıe jaǵylsa, soǵan shyryldap arasha túsemiz. Biz bir-birimizge matanyp, baılanyp qalǵanbyz. Sol sıaqty meniń Ushqyn baýyrym da qatarymyzǵa qosylyp, ónerde úlken dúnıeler jasap jatyr, Ushqyn, qýanyshyń qutty bolsyn." - dep izgi tilegin bildirdi Toqtar Serikov.
–Búgin Ushqyn baýyrymyzdyń keremet án jınaǵynyń tusaýkeseri ótip jatyr. Ushqyn óte talantty, besaspap jigit. Ánshiligi, kompozıtorlyǵy, ándi óńdeýi, bári de keremet. Bolashaǵy óte zor. Ushqynnyń taǵy bir qyry onyń rejıserlik qabiletiniń myqtylyǵy. Ol biraz beınabaıandy túsirýge túrtki boldy. Ushqynnyń kompozısıalyq qyry onyń ózindik ereksheligi baryn kórsetedi. Onyń ánderin birden ańǵarýǵa bolady - dep aǵalyq tilegin bildirdi Ádil Slamhan.
"Alashuly" tobynan bólinip shyqqannan keıin ánshi kórermenniń joǵary talabyn eskere otyryp, barynsha shyn yqylasymen jumys isteýge kiriskenin aıtady.
–Bári ýaqyttyń enshisinde. Qolymyzdan kelgenshe, jaqsy dúnıeler jasap, talpynýǵa tyrysyp jatyrmyz. "Jylamasyn sábıler" qaıyrymdylyq qoryna arnalǵan úlken jobalarymyz bar. Óner adamy retinde balalardyń jylamaı, alańsyz ómir súrýine túrtki bolsaq degen nıetpen osy jobany uıymdastyrdyq. Aldaǵy ýaqytta da osyndaı sharalardy qolǵa alyp, túsken qarjyny túgeldeı muqtaj balalarǵa beretin bolamyz,– dep aldaǵy josparlarymen bólisti ánshi-sazger Ushqyn Jamalbek.
Pikir qaldyrý