Bıyl jyl basynan beri (qańtar-aqpan) barlyq qarjy kózderi esebinen 1,7 mln sharshymetr turǵyn úı nemese 15 myń baspana paıdalanýǵa berildi. Bul týraly Úkimet otyrysynda Indýstrıa jáne ınfraqurylymdyq damý mınıstri Roman Sklár málim etti.

 Mınıstrdiń  aıtýynsha, satyp alý quqyǵynsyz jalǵa beriletin turǵyn úılerdiń qurylysy úshin óńirlerge respýblıkalyq búdjetten 32,8 mlrd teńge qarastyrylǵan. Shamamen 4,5 myń páterdiń qurylysy josparlanýda (230,1 myń sharshy metr).

–Memleket basshysynyń «Nur Otan» partıasynyń XVİİİ sıezinde bergen tapsyrmalaryn iske asyrý úshin 2019 jylǵa búdjetti aıqyndaý aıasynda kóp balaly otbasylar úshin jaldamaly turǵyn úıdiń qurylysyna jáne satyp alýǵa óińirlerge 50 mlrd teńge bólý qarastyrylǵan. Jalpy atalǵan is-sharaǵa 7 jyl ishinde 350 mlrd teńge bólinedi. Bul jyl saıyn 6 myń kóp balaly otbasyny pátermen qamtamasyz etýge múmkindik beredi. Iaǵnı, 7 jylda 40 myńnan astam páter beriledi degen sóz, – dep atap ótti mınıstr.

Búgingi tańda 25 mlrd teńgeniń qurylys jobalar tizimi jasaldy. Daıyn páterlerdi satyp alý úshin 25 mlrd teńge qarastyrylyp otyr.. Bul kópbalaly otbasylardyń turǵyn úı máselelerin sheshýdi tezdetýge yqpal etedi.

–Mysaly, Túrkistan oblysynda 4 832 kópbalaly otbasy kezekte tur. Osyǵan baılanysty óńirge proporsıonaldy 8,6 mlrd teńge bólinýde. Bul qarajattan 4,3 mlrd  teńge qurylysqa, qalǵan 4,3 mlrd teńge daıyn páter satyp alýǵa beriledi. Soltústik Qazaqstan oblysyndaǵy 342 otbasyǵa beriletin lımıt 700 mıllıon teńgeni quraıdy, - dedi Roman Sklár.

Usynǵan: Erkin Qaldan