Seısenbi, 26 naýryzda Jańaózen qalalyq tergeý soty qaladaǵy jumyssyz jastardyń máselesin kóterip júrgen belsendi Erjan Elshibaevty eki aı qamaýǵa alý týraly sheshim shyǵardy dep habarlaıdy Qamshy.kz aqparat agenttigi Azattyq radıosyna silteme jasaı otyryp.

Erjan Elshibaev "Buzaqylyq" (qylmystyq kodekstiń 293-babynyń 3-tarmaǵy) boıynsha qozǵalǵan qylmystyq is boıynsha kúdikke ilinip otyr. Ony tergeý organdary "2017 jyly qalada bolǵan tóbeles kezinde bir adamnyń kózin jaralaǵan" dep aıyptaǵan.

Onyń advokaty Kenje Muńaıtpasulynyń aıtýynsha, seısenbi kúngi sotqa ýaqytsha tergeý ızolátorynda otyrǵan Erjan Elshibaev onlaın arqyly qatysqan. Sotta "dálel" retinde kórsetilgen vıdeoda Elshibaevqa uqsas bireýdiń tóbelesip jatqany baıqalǵan. Biraq Elshibaev taǵylǵan aıyppen kelispegen.

Advokat Kenje Muńaıtpasuly bul jaıtty Erjan Elshibaevtyń sońǵy kezdegi belsendiligimen baılanystyrady. Ol bir aıdan beri ákimdik aldyna jınalyp júrgen jastardyń máselesin kóterip, bılikten jumys berýdi talap etip kelgen.

- 2017 jyldan beri jáne qazir de eshkim bul jaǵdaıǵa baılanysty shaǵymdanbaǵan. Shamasy, Erjannyń belsendiligine baılanysty bolýy múmkin dep oılaımyn. Bul aıyppen Elshibaev ta, men de kelispeımin. Apelásıalyq shaǵym túsiremiz, úsh kún ýaqyt bar, - dedi Kenje Muńaıtpasuly.

31 jastaǵy Erjan Elshibaevty polısıa 24 naýryz kúni úıinen ustap alyp ketken. Belsendi buǵan deıin de polısıa qysymyna shaǵymdanǵan.

Aqpan men naýryz aılarynda Jańaózen jastary qaladaǵy jumyspen qamtý jáne áleýmettik bólim ǵımaratynyń (burynǵy "Neke saraıy") aldyna jınalyp, birneshe apta boıy bılikten munaı salasynda jumys taýyp berýlerin suraǵan.  Turǵyndar narazylyǵynan soń izinshe olarǵa qysym jasalyp jatqany týraly aqparat paıda bolǵan. Biraq polısıa bul aqparatty joqqa shyǵarǵan edi. 

Jańaózende jumyssyzdar ákimdikke talappen taǵy da keldi (11 naýryz 2019 jyl).

Usynǵan: Farıza Jomartqyzy