Oraldaǵy uıaly baılanys salonyna jasalǵan shabýyl týraly tyń derekter shyqty. Jelide jarıalanǵan vıdeoda dúkenge kelýshi satýshyǵa birneshe ret pyshaq suqqany kórinedi. 31 jastaǵy kásipker áli de aýyr jaǵdaıda jatyr, - dep habarlaıdy Qamshy.kz aqparat agenttigi Tengrinews.kz saıtyna silteme jasaı otyryp. 

Vıdeodan 23 naýryzda "Mobılnık" uıaly baılanys salonyna er adamnyń kirgenin kórýge bolady. Ol satýshymen sóılesip, telefondar men onyń aksesýarlaryn kórsetýdi suraıdy. Satýshy artqa buryla bergende qaskúnem pyshaǵyn shyǵaryp, beline birneshe ret suqqan. 

"Oǵan deıin qylmysker dúkende 40 mınýt boıy júrgen. Telefon tańdap jatqandaı bolypty. Ol satýshynyń arqasynan eki ret pyshaqtap, qarap turǵan telefonyn alǵan da, qashyp ketken. Er adam osyndaı qylmysy úshin úsh ret sottalǵanyn bildik. Ol bul shabýylǵa daıyndalǵan", - dedi zardap shegýshiniń tanysy Vladımır. 

31 jastaǵy satýshy qalalyq kópsalaly aýrýhananyń jan saqtaý bólimine jetkizildi. Dárigerler onyń ómiri úshin tórt saǵat boıy arpalysty. Pasıenttiń qolqasy zaqymdanyp, kóp qan joǵaltqan. 

"Naýqasqa ota jasaldy. Jaǵdaıy aýyr. Hırýrgıa bólimine aýystyryldy. Ózine keldi, ózi dem ala alady", - deıdi qalalyq kópsalaly aýrýhana dırektorynyń orynbasary Baqtıar Tashkenbaev.

Polısıada QR Qylmystyq kodeksiniń 192-baby, 1-bólimi boıynsha sotqa deıingi tergeý júrgizilip jatqanyn habarlady. Ustalǵan kúdikti polısıa basqarmasynda ýaqytsha ustaý ızolátoryna ornalastyryldy. 

Usynǵan: Farıza Jomartqyzy