Keshe 26 naýryzda Nur-Sultan qalasynda bolǵan jantúrshigerlik apattan 2 adam kóz jumyp, 27 jolaýshy zardap shekken edi.
"Astana LRT" kompanıasynyń baspasóz hatshysy Naýat Azanbaevanyń aıtýynsha, jol kólik-apatynan qaza tapqan júrgizýshi №1 avtobýs parkindegi qala syrtyna qatynaıtyn №303 baǵdarynda jumys istegen dep jazady Qamshy.kz aqparat agenttigi sputniknews.kz saıtynyń deregin negizge alyp.
"Qaza tapqan júrgizýshi №1 avtoparkte jumys istegen. Onyń marshrýty qala syrtyna qatynaıtyn bolǵan soń, ol "Shanhaı" bazarynan jelige shyǵady. Osy avtoparkte zańdy túrde qyzmet etken", - dedi ol.
Qoǵamdyq kólikter avtoparkten tańǵy saǵat 5:00 shamasynda baǵdarǵa shyǵady. Tańerteń avtobýs júrgizýshileri mindetti túrde medısınalyq tekseristen ótedi.
"Parkten shyqpas buryn qoǵamdyq kólikterdi mindetti túrde tekseremiz. Eger aqaý tabylsa, jolaýshylarǵa qyzmet kórsetýge jiberilmeıdi. Avtobýsty jóndeýge jiberemiz. Sondaı-aq, júrgizýshiler medısınalyq tekseristen ótpese, jumysqa shyǵa almaıdy", - deıdi №1 avtobýs parkiniń qyzmetkeri Hasen Muhamedjanov.
Medısınalyq jáne tehnıkalyq synaqtan súrinbeı ótken júrgizýshi elordalyq jolaýshylarǵa qyzmet kórsetýge kirisedi.
Sonymen qatar, jol apatynan qaza tapqan júrgizýshiniń áriptesteri qaıǵyly oqıǵaǵa qatysty pikir bildirdi.№1 avtobýs parkiniń 61-shi baǵytynyń júrgizýshisi Nurjan Turlybaı jol apatyna júrgizýshiniń densaýlyǵy sebep boldy dep paıymdaıdy.
"Vıdeony kórdik. Avtobýstyń tejegishi durys istemeı qaldy dep aıta almaımyn. Tipti, tejegish istemeı qalǵan kúnniń ózinde avtobýs júrgizýshisi janyn aman saqtap qalý úshin kólikti ońǵa nemeske solǵa burýshy edi. Adamdar barlyǵyn kórip turdy ǵoı. Meniń oıymsha, avtobýs júrgizýshisine birdeńe bolǵan. Jaıdan jaı, joǵary jyldamdyqpen avtobýsqa soǵylmaıdy ǵoı", - dedi ol
Sonymen qatar avtobýs parkiniń qyzmetkeri júrgizýshilerdiń jalaqysy kóterilgenin, ári uıqysy qanyp júretinin atap ótti.
"Jumysqa tańǵy 4:30-da turamyn. Bizdi avtoparkke qyzmettik kólik alyp keledi. Tańǵy 6-dan túngi 11-ge deıin marshrýtta jumys isteımiz. Osy jumysta júrgenime 10 jyl boldy. Sondyqtan organızm úırengen. Mundaǵy júrgizýshilerdiń jalaqysy 250 myń teńge", - dedi Nurjan Turlybaı.
Qaladaǵy №36 baǵdarda jumys isteıtin avtobýs júrgizýshisi Qaharman Imanbaev qaza tapqan júrgizýshiniń óte tájirıbeli ekenin atap ótti.
"Áleýmettik jelidegi vıdeony kórdim. Avtobýsta tehnıkalyq aqaý bolýy múmkin emes. Sebebi, ony mamandar parkten tekserip shyǵarady. Meniń oıymsha, júrgizýshiniń júregi toqtap qaldy ma, áıteýir birnárseniń densaýlyǵyna áser etkeni anyq. Áıtpese, kásibı deńgeıi joǵary, tájirıbesi mol júrgizýshi ǵoı. Ol mundaıǵa jol bermes edi. Joldaǵy jaǵdaıdy aldyn ala bilip otyrady ǵoı", - deıdi №1 avtobýs parkiniń qyzmetkeri.
Sonymen qatar ol "avtobýs júrgizýshileriniń uıqysy qanbaı jumysqa shyǵady" degenge óz pikirin bildirdi.
"Búgin tańǵy 5-te turdym, keshki 9:30-ǵa deıin avtobýs júrgizemin. Janymda kómekshim bolsa, jumys aýyr emes. Biraq ol bolmaǵan kezde 2-3 kún jumys isteımin. Avtobýs júrgizgenime 10 jyl boldy. Eger sharshaıtyn bolsam, basshylyqtan demalys suraımyn. Búgin 6 saǵat uıyqtadym", - deıdi Qaharman Imanbaev.
№1 avtobýs parkiniń №18 marshýrt júrgizýshisi Joldanǵar Maǵzumov jolda óte sabyrly bolý qajet ekenin aıtty. Avtobýs júrgizgenine 18 jyl bolǵan júrgizýshiniń pikirinshe, bul jol apatynyń aldyn alýǵa septigin tıgizedi.
"Bizdiń jumysta óte sabyrly bolý kerek, ári eshteńege renjimegen abzal. Sondaı-aq densaýlyǵyńdy da kútip júrgen jón. Qaıǵyly oqıǵanyń vıdeosyn barlyǵy kórdi. Jol apatynyń neden bolǵanyn bir Alla biledi", - dep túıindedi sózin tájirıbeli júrgizýshi.
"Astana LRT" kompanıasynyń málimetine sáıkes, qalada búginde 8 avtobýs parki bar eken. Onda jalpy 1694 avtobýs júrgizýshisi jumys isteıdi.
Aıta ketsek, keshe Nur-Sultan qalasynda 3 avtobýs, jedel járdem kóligi jáne jeńil kólik jantúrshigerlik apatqa ushyrady. Saldarynan 53 jastaǵy avtobýs júrgizýshisi men 26 jastaǵy jolaýshy qyz qaza taýyp, 27 adam zardap shekti.
Usynǵan: Ásel Bolatqyzy
