Almaty ákimi Baýyrjan Baıbek Nur-Sultan qalasyna jumys sapary kezinde «Bolashaq» baǵdarlamasy túlekteri aǵylshyn tilinen qazaq tiline tikeleı dýblájdaǵan 28-shi fılminiń premera aldyndaǵy kórsetiliminde boldy.
Baýyrjan Baıbek óziniń sózinde barlyq bolashaqshylar atynan Elbasyǵa úzdik kórkem jáne annımasıalyq fılmderdi qazaq tiline dýblájdaý jónindegi áleýmettik baǵdarlamaǵa qoldaý kórsetkeni úshin alǵys aıtty, sonymen qatar Tuńǵysh Prezıdenttiń Memlekettik saıasatynyń ómirsheńdigi men úndestigin atap ótti.
«90-shy jyldardyń asa kúrdeli kezeńinde Qazaqstannyń Tuńǵysh Prezıdenti Nursultan Ábishuly Nazarbaevtyń bastamasy boıynsha erekshe turǵydaǵy «Bolashaq» bilim baǵdarlamasynyń daıyndyǵy bastalyp, jas qazaqstandyqtarǵa laıyqty bilim berýge, elimizdiń paıdasy úshin úzdik álemdik praktıkany ıgerý múmkindigine qoljetti. Qazirgi kezde 12 myńnan astam bolashaqshylar Otanymyzǵa oralyp, ekonomıkanyń ár salasynda elimizdiń keleshegi jolynda eren eńbek etýde. Biz qashanda elimizge, halqymyzǵa, Tuńǵysh Prezıdentimizge alǵys bildiremiz. Mine, sondyqtan 2001 jyly alǵashqy túlekter alǵan bilimderin, kúsh-jigerlerin, tájirbelerin biriktirip, elimizdiń damýy jolynda ári Elbasynyń ómirsheń baǵytyn odan ári jalǵastyrý úshin «Bolashaq» Asosıasıasyn qurdy», - dep atap ótti Baýyrjan Baıbek.
Ol óziniń sózinde 2011 jyly prezıdenttik «Bolashaq» baǵdarlamasynyń túlekteri balalar men jastar arasynda memlekettik tildiń keń qulash jaıýyna, qazaq tilinde sapaly ári básekege qabiletti kontenttiń qalyptasýyna yqpal etkenderin aıtty.
«Biz aldymyzǵa óziniń memlekettik tilin biletin, jaqsy kóretin jáne qurmetteıtin urpaq tárbeleýge kómektesýdi maqsat etip qoıdyq. Jumysymyzdy alǵash bastaǵan kezde Nursultan Ábishuly Nazarbaev batasyn berdi. Dál osy sahnada budan segiz jyl buryn Memleket basshysynyń quttyqtaý sózi oqyldy. Qazirgi kezde «Ózińnen basta» áleýmettik jobasy qazaq kórermenderi, iri qazaqstandyq bıznes ókilderi arasynda keń qoldaý taýyp, memlekettik tildiń odan ári damýyna otbasylyq jáne balalar kontenti arqyly oń áser etýde», - dedi ol.
Aıta keterligi, jalpy quny 5,8 mlrd. AQSH dollary bolatyn Disney, Sony Pictures, Marvel, Lucasfilms, BAZELEVS jáne EuropaCorp stýdıalarynyń 28 álemdik fılmderi joǵary tehnologıanyń arqasynda dýblájdanyp, shynaıy ulttyq ónimge aınaldy. Qazaq tili 2 túrik tiline, Sony Pictures 7 tiline, WaltDisney 39 tiline aınaldy, álemde DVD, Blu-Ray boıynsha estýge bolatyn 7-shi negizgi tilderdiń qataryna qosyldy.
Óz kezeginde, bıylǵy jyly Qazaqstannyń jas kórermenderi qazaq tiline dýblájdalǵan taǵy 5 fılmniń premerasyn kóredi. Olardyń arasynda «Aladdın», «Oıynshyqtar tarıhy 4», «Koról Arystan» jáne «Muz júrek 2» fılmderi bar, al 28 naýryzdan bastap kınoteatrlar ekrandarynan fentezı stılinde rejıser Tım Berton túsirgen otbasylyq «Dambo» kınosy kórsetiledi.
1941 jylǵy tanymal múltfılmniń fılm-remeıginen qalqan qulaqty kishkentaı pildiń qyzyq oqıǵalarǵa toly ómirin, túrli ájýadan mezi bolǵan soń ushýdy úırengenin tamashalaýǵa bolady. «Dambo» fılmin dýblájdaǵan rejıser Nazerke Lesbekkyzy Júrgenov atyndaǵy Qazaq ulttyq óner akademıasynyń túlegi. Odan ózge dýblájdaý barysyndaǵy jumysqa 30-dan astam qazaqstandyq kásibı artıser qatysty.
