Bangladeshte jas bosanǵan áıel bir aıdan soń taǵy bir ul men qyzdy aman-esen ómirge ákeldi dep habarlaıdy Qamshy.kz aqparat agenttigi Mirror saıtyna silteme jasap. 

Bangladeshte turatyn jas otbasy – 20 jastaǵy Arıfa Sýltana men kúıeýi Sýmon Bısýoz 25 aqpan aıynda alǵash ret balaly bolyp, ata-ana atanady. Jas ana balaly bolýdyń qyzyǵyna endi úırenise bastaǵanda, 26 naýryz kúni taǵy da perzenthanaǵa túsedi.

Sóıtip, kelinshek kóp uzamaı taǵy da eki bópeni dúnıege alyp keledi. "Bir aı keshigip dúnıege kelgen ul men qyzdyń densaýlyǵy óte jaqsy",- deıdi Arıfanyń dárigerleri.

Medısına qyzmetkerleriniń aıtýyna qaraǵanda, Arıfanyń eki jatyry bar eken. Sol sebepti birinshi balasyn bosanǵannan keıin taǵy da egizderge aıaǵy aýyr ekenin bilmegen. Bul tabıǵatta óte sırek kezdesetin qubylys deıdi mamandar. Birinshi balasyn týǵannan keıin 26 kúnde taǵy da sýy ketip, perzenthanaǵa jetkizilipti.

Turmys deńgeıi ortasha jas jubaılar jaryq dúnıe esigin endi ashqan sábılerin ósirýge shamamyz jeter me eken dep ýaıymdaıdy. Degenmen, otaǵasy úsh balasyn da eshkimnen kem qylmaımyn dep ózine sert berip otyr.

"Allanyń bergen syıy shyǵar, sábılerimniń bári deni saý bolyp týdy. Olardy baqytty etý úshin barymdy salamyn", - dedi úsh balanyń ákesi Sýmon.

Usynǵan: Maqpal Sembaı