Almaty oblysynda kásipkerlik negizderine úıretýge baǵyttalǵan «Bastaý» jobasy boıynsha oqytý bastaldy. Joba 2017-2021 jyldarǵa arnalǵan «Eńbek» Nátıjeli jumyspen qamtý jáne jappaı kásipkerlikti damytý baǵdarlamasy aıasynda júzege asyrylady jáne jumyssyz, ózin-ózi qamtyǵan azamattar men jańadan bastaǵan kásipkerlerge arnalǵan.

Óńirlik kásipkerler palatasy Qarjylaı emes qoldaý bóliminiń basshysy Erlan Datqaevtyń aıtýynsha, bıyl oqytý barlyq aýdan ortalyqtarynda ótedi.

«Kásipkerler palatasy 2019 jyly 1500 adamdy bızneske oqytyp, solardyń ishinen 300-ge tarta jobany qarjylandyrýdy josparlap otyr. Jalpy bıyl Almaty oblysynda shaǵyn nesıelendirýge 4,7 mlrd teńge bólingen», - dedi Erlan Datqaev.

Ótken jyly da oqytý oblystyń barlyq aýdanynda ótkizildi. Kýrsqa 3361 adam qatysyp, onyń 916 qatysýshysy óz isin ashyp, jobalary jalpy somasy 2,5 mlrd teńgeden astam qarjyǵa qarjylandyryldy.

«Bastaý» jobasy boıynsha bir aılyq kýrsta sabaqty otandyq bıznes-trenerler  beretin bolady.

«Oqytý baǵdarlamasy aıasynda qatysýshylarǵa salyq rejımderi, zańnamadaǵy ózgerister túsindiriledi, marketıń negizderi, bıznes salasyndaǵy suranystaǵy baǵyttar jóninde bilim beriledi. Teorıalyq sabaqtarmen birge tájirıbelik dárister, kásipkerlik obektilerin aralaý, tabysty bıznes ókilderimen kezdesý uıymdastyrylady», - deıdi bıznes-trener Arnur Toqanuly.

Aıta keteıik, qatysýǵa ótinim Kásipkerler palatasynyń fılıaldary nemese Jumyspen qamtý ortalyǵy, jergilikti ákimdik arqyly qabyldanady jáne úmitkerler onlaın testileýden ótedi. Onyń nátıjesi boıynsha oqýǵa qabyldanady.