Bul týraly búgin partıanyń Ortalyq apparatynda ótken is-sharada belgili boldy dep habarlaıdy Qamshy.kz aqparat agenttigi.
Naqty aıtar bolsaq, partıanyń kezekti XVIII sezinde Elbasy, partıa Tóraǵasy Nursultan Nazarbaev «Nur Otan»-ǵa ár maýsym saıyn memlekettik baǵdarlamalardyń júzege asyrylý barysy týraly ortalyq memlekettik organ basshylaryn tyńdaýdy tapsyrǵan bolatyn. Osyǵan oraı partıanyń bastamasymen Memlekettik baǵdarlamalar men reformalardy júzege asyrýdyń tıimdiligin baǵalaý jáne monıtorıń júrgizý ortalyǵy quryldy. Búgin atalǵan ortalyqtyń alǵashqy otyrysy ótip, onda bıznesti qoldaýǵa jáne damytýǵa arnalǵan «Bıznestiń jol kartasy-2020» memlekettik baǵdarlamasynyń júzege asyrylý barysy týraly esep tyńdaldy.
Sóz basynda «Nur Otan» partıasy Tóraǵasynyń Birinshi orynbasary Elbasynyń sıeze bergen tapsyrmasyna nazar aýdaryp, ony oryndaý úshin partıa júıeli jumysty bastap ketkenin aıtty.
– Bul jumystardyń maqsaty partıanyń memlekettik organdardan esep talap etý emes, kerisinshe baǵdarlamalardy tıimdi ári ýaqytyly júzege asyrýǵa yqpal etip, elimizdiń strategıalyq qujattarynda kórsetilgen tıisti sharalardy qolǵa alý. Osyndaı tyńdaýlardyń «Bıznestiń jol kartasy-2020» baǵdarlamasynan bastalǵany da tegin emes. Óıtkeni el ekonomıkasy men halyqtyń ál-aýqaty kásipkerlikpen tikeleı baılanysty, – dedi Máýlen Áshimbaev.
Sondaı-aq ol atalǵan tyńdaýlardyń jańa formatta ótkizile bastaǵanyn tilge tıek etip, kóterilgen taqyryptyń ashyq talqylanatynyn atap ótti. Osy rette tyńdaýlar áleýmettik jelilerde tikeleı efırde kórsetiletinin aıta ketken jón. Sol arqyly talqylaýǵa kez kelgen azamattyń qatysyp, óz pikirin bildirýine mol múmkindik bar.
Sonymen birge partıa Tóraǵasynyń Birinshi orynbasary mundaı tyńdaýlardyń nátıjesinde utymdy usynystar daıyndalatynyn jetkizdi.
– Osyndaı tyńdaýlardyń qorytyndysy boıynsha partıa janynan qurylǵan jańa Ortalyqpen birge birqatar usynystar daıyndap, ony eldiń basshylyǵy men Úkimetke joldaımyz. Sondyqtan búgingi talqylaýlar naqty usynystar daıarlaýǵa óz septigin tıgizip, elimizdegi kásipkerlik salasyn damytýǵa tyń serpin beredi dep senemin, – dedi Máýlen Áshimbaev.
Otyrys barysynda Ulttyq ekonomıka mınıstri Rýslan Dálenov, «Atameken» UKP-nyń Basqarma Tóraǵasy Abylaı Myrzahmetov, «Nur Otan» partıasy Memlekettik baǵdarlamalar men reformalardy júzege asyrýdyń tıimdiligin baǵalaý jáne monıtorıń júrgizý ortalyǵynyń dırektory Rahym Oshaqbaev jáne taǵy basqa mamandar sóz alyp, atqarylǵan jumystar jóninde aıtty.
