Áleýmettik jelide Túrkistan oblysyna qarasty Jetisaı aýdanynda úsh qyz balaǵa ógeı shasha tarapynan zorlyq-zombylyq kórsetilgeni týraly aqparat taraýda. Aqparatty Túrkistan oblysy ákimdiginiń baspasóz qyzmeti rastady. 

"2019 jylǵy 11 sáýir kúni orta mektep dırektory aýdandyq bilim bólimine atalǵan mektepte oqıtyn kámelet jasqa tolmaǵan apaly-sińli úsh qyzda dene jaraqaty bar ekenin habarlaǵan.

Erteńine, ıaǵnı 12 sáýir kúni aýdandyq polısıa bóliminiń tarapynan QR Qylmystyq Kodeksiniń 140 baby, 2 tarmaǵy boıynsha (Kámeletke tolmaǵan adamdy tárbıeleý jónindegi mindetterdi oryndamaý) sotqa deıingi tergeý jumystary bastaldy.

Qazirgi tańda balalar Jetisaı aýdandyq ortalyq aýrýhanasynda dárigerler qaraýynda. Olardyń densaýlyǵy men ómirine esh qaýip joq.

Atalǵan isti Oblys prokýrory óz baqylaýyna aldy. Búgin kúdikti azamatshaǵa qatysty shekteý sharalary qoldanylady", - delingen resmı málimdemede.

Beınejazbalar men fotosýretterdegi balalar alǵan jaraqattyń bir emes birneshe ret qaıtalanǵany baıqalady. Óıtkeni, sońǵy jaraqattar qantalap tursa, aldyńǵy zardaptardyń oryny jara bolyp bitken.

Úsh qyz bala kimniń nesibesin tartyp jedi eken? Álde ákeleriniń ógeı sheshege degen mahabbatyna tosqaýyl boldy ma? 28 jastaǵy jas áıeldiń munsha zulymdyqqa barýyna ne túrtki?

Másele túbegeıli naqtylanýy tıis. QR Konstıtýsıasyndaǵy Bala quqyǵy týraly zańdy belshesinen basqan áke de jaýapqa tartylýy kerek.

Al ar aldynda da, zań aldynda da aýyr qylmys jasaǵan áıel qatań túrde jazalanýy tıis.