Áleýmettik jelide jappaı taralǵan myna bir jaıt kópshiliktiń kóńilin aýdardy dep habarlaıdy Qamshy.kz aqparat agenttigi. 

Málimetterge súıensek, Jetisaıdaǵy ápkeli-sińli úsh qyzdyń ógeı anasy olardy aıaýsyz soqqyǵa jyǵyp, uzaq ýaqyt qorlap kelgen eken.

"Apaly-sińlili: 2003 jylǵy Salıma, 2005 jylǵy Mánshúk, 2007 jylǵy Mılana. Bul qarakózderimizdiń kórmegen qorlyǵy qalmapty. Ógeı analary, 1991 jylǵy Kóbeeva Juldyz fashıserden de asyp túsken sıaqty. Kámelet jasyna tolmaǵan qyzdardyń tyrnaqtarynyń astyna qaıta-qaıta ıne tyǵyp, jylaıyn dese, uryp-soǵyp "kúlip tur" dep, jandaryna batyp tursa da, ezýlerin tartqyzyp, tońazytqyshqa birtalaı ýaqyt otyrǵyzyp qınap, qaıshymen denelerine jaraqat salyp, shaılaryna gel qosyp berip ishkizip, tipti jynystyq múshelerin kempiraýyzben qysyp, jaraqat salyp júrgen eken. Bul qyzdardyń kórgen azaptary adam aıtqysyz. Aıdyń-kúnniń amanynda osyndaı jaǵdaıdy "jabýly qazan jabýly" etip qaldyrýǵa umtylǵan Jetisaı aýdany basshylarynyń, quzyrly mekemeleriniń ne bala-shaǵalary, ne júrekteri joq dep qalasyń osyndaıda! Bes kúnnen beri aýrýhanada jatqan qyzdardyń jaǵdaıyn jergilikti jerdiń atqaminerleri tipti suramaǵan da! Al, kómek berý týraly múldem áńgime joq! Iá, bir adamnyń jaýyzdyǵyna myń adam jaýapsyzdyǵymen jaýap berip júrgenine eriksiz qaıran qalasyń!

Jetisaıdan tabylmaǵan arashany Túrkistan Oblysynyń basshylary, zań oryndarynan, densaýlyq saqtaý basqarmasynan suraımyz! Qarakózderimizdi jylatýǵa jol bermeıik! Jáne álgi ógeı sheshelerin qatań jazaǵa tartaıyq!.." dep jazdy Áset Ássandı esimdi azamat óziniń feısbýk áleýmettik jelidegi paraqshasynda. 

Bul jazba áleýmettik jelilerdiń bárinde keńinen taralyp, kópshiliktiń synyna qaldy. Ógeı shesheniń qatygezdigine jany aýyryp, jaǵasyn ustaǵan halyq san túrli pikir qaldyryp, tez arada ógeı shesheni taýyp, tıisti jazasyn berý kerektigin jarysa jazýda. Sýretti kórgen kez kelgen adamnyń ishi alaı-dúleı bolyp, beıbit kúnde bul ne sumdyq dep tóbe shashyń tik turady.  Sýretterge beı-jaı qaraý múmkin emes.

Osy jaıtqa baılanysty Túrkistan oblysy ákiminiń baspasóz qyzmetinen habarlama taratyldy. Habarlamada "2019 jylǵy 11 sáýir kúni orta mektep dırektory aýdandyq bilim bólimine atalǵan mektepte oqıtyn kámelet jasqa tolmaǵan apaly-sińli úsh qyzda dene jaraqaty bar ekenin habarlaǵan. 

Erteńine, ıaǵnı 12 sáýir kúni aýdandyq polısıa bóliminiń tarapynan QR Qylmystyq Kodeksiniń 140 baby, 2 tarmaǵy boıynsha (Kámeletke tolmaǵan adamdy tárbıeleý jónindegi mindetterdi oryndamaý) sotqa deıingi tergeý jumystary bastaldy.

Qazirgi tańda balalar Jetisaı aýdandyq ortalyq aýrýhanasynda dárigerler qaraýynda. Olardyń densaýlyǵy men ómirine esh qaýip joq. 
Atalǵan isti Oblys prokýrory óz baqylaýyna aldy. Búgin kúdikti azamatshaǵa qatysty shekteý sharalary qoldanylady" delingen.

Usynǵan: Maqpal Sembaı