Almaty men Aqtóbe qalasynyń kásipkerleri órtenip ketken hrıstıan shirkeýin qalpyna keltirýge myńdaǵan eýro bóldi.

Almaty turǵyny Lıana Asadýllaeva Parıjde eki ret bolǵan. Biraq "Qudaı Ana" shirkeýin kóre almapty. Qazir almatylyq shirkeýge joly túspegenine ókinedi.

"Túni boıy uıyqtamadym. Órt sóndirýshiler otty óshire alady dep úmittendim. Parıjden myńdaǵan shaqyrym alysta bolsam da, janynda turǵandaı sezim boldy. Shirkeý tolyq órtenbese eken degen barlyq álem jurtshylyǵymen birgemin. Bolǵan jaǵdaı janyma batyp barady..." - deıdi Lıana.

Lıana – kásipker-ónertanýshy. Qaıyrymdylyqtan da alshaq emes. Jyl saıyn óziniń kórme uıymdastyryp, odan túsken qarajatty jas sýretshilerdi qoldaýǵa jumsaıdy. Al qazir Lıana Parıjdegi shirkeýdi qalpyna keltirý úshin myń eýro aýdarypty.

Aqtóbelik Rýslan Ásetuly Parıjdi de, shirkeýdi de tek kınodan, sýretten kórgen. Biraq Eýropadaǵy shyǵys naqyshynda salynǵan qurylystyń qurdymǵa ketýi ony beı-jaı qaldyrmaǵan.

"Men ónerdi súıemin. Bul jerde memleket, din, ult degen dúnıeler mańyzdy emes. Bizdiń mindet – keremetterdi keler urpaq úshin saqtap qalý. Men qatty kúızeldim. Endi qazirgi ýaqytta ǵımaratty qalypqa keltirý úshin fızıkalyq, moraldyq jáne aqshalaı kúsh kerek. Túsinemin, meniń 1700 eýrom teńizge tamshy tamyzǵandaı, eger árbirimiz qoldan kelgen kómegimizdi kórsetsek, bolashaqqa baǵyttalǵan is bolar edi", - deıdi Rýslan.

Fransıanyń mádenı qundylyqtaryn saqtaý memlekettik qory «Qudaı Ana» shirkeýin qalpyna keltirý úshin qarajat jınaı bastady. "Notr-Damdy qutqaraıyq" degen uranmen mekeme saıtynda arnaıy bólim paıda boldy.

Qoldanýshylarǵa 50 men 500 eýro arasyndaǵy nemese kez-kelgen qarjy kólemin aýdarý usynylǵan.

Eske sala keteıik, Fransıadaǵy "Qudaı Ana" shirkeýi 15-sáýir kúni keshki mezgilde órtke orandy. Qazir jalyn aýyzdyqtalyp, salqyndatý sharalary júrgizilýde. Órt sóndirýshiler shirkeýdiń eki munarasyn, jalpy qańqasyn, ishindegi mádenı qundylyqtardy aman alyp qaldy.