Prezıdent tapsyrmasyna oraı qazir  jer-jerde kóp balaly jáne áleýmettik jaǵynan az qamtylǵan otbasylarǵa qamqorlyq kórsetilip jatyr.

Keshe sondaı ıgilikti sharanyń biri Tekeli qalasynda oryn aldy. Atap óter bolsaq, 37 jastaǵy «Kúmis alqa» ıegeri Nazgúl Qojykeeva osy ýaqytqa deıin balalaryn ózi ósirip, ózi tárbıelep keldi. On jyldan beri jaldamaly páterde turyp kele jatqan anaǵa keshe shahar basshysy qamqorlyq kórsetti. Qala ákimi Bahtıar Ónerbaev jergilikti kásipkerlerdiń kómegimen jalǵyzbasty anaǵa 4 bólmeli úıdiń kiltin tabys etti. Aıta ketetin bir jaıt, otbasyndaǵy eń kishkentaı sábı –segiz aılyq. Aty –Inabat. Kishkentaı sábı bir jasqa tolǵanda anasy  Nazgúlge «Altyn alqa»  belgisi tapsyrylatyn boldy.

Qazirgi ýaqytta otbasy memleketten ataýly áleýmettik kómek alyp,  balalardyń járdemaqysymen kúneltip otyr.  Endi olar 1 sáýirden bastap kóp balaly analarǵa beriletin memlekettik 165997 teńge járdemaqy alady.

–On jyldan beri páter jaldap turdyq. «Ózimizdiń páterimiz qashan bolady?» dep armandadyq. Qaıyrymdy jandar qoǵamda bar eken. Eń aldymen qala ákimi Bahtıar Ónerbaevqa jáne úıdi áperýge qolushyn sozǵan kásipker azamattarǵa myń alǵys. Mektep te – janymyzda. Balalarym endi alańsyz uıyqtaıtyn boldy. Soǵan qýanamyn,–deıdi jalǵyzbasty, kóp balaly ana.

Aıta ketý kerek, qazirgi ýaqytta Tekeli qalasynda 415 kóp balaly otbasy turady. Qala ákimi Bahtıar Ónerbaevtyń aıtýynsha, olardyń 170 -ne baspana kerek. Al resmı túrde kezekte turǵany – 55 otbasy ǵana.  Ultjandy azamat, qala basshysy bul rette kásipkerler tarapynan jasalynyp jatqan ıgi qadamdardyń jalǵasatynyn atap ótti. Arnaıy qurylǵan qaıyrymdylyq qorynan mamyr aıynda taǵy da kóp balaly bir otbasyǵa baspana satyp áperilmek.

–Memlekettik qoldaýdyń arqasynda Tekeli qalasynyń kásipkerleri qaıyrymdylyqtan syrt qala almady. Kásipker Vıktor Sychev bizdiń bastamamyzdy qoldap, Nazgúl Qojykeevaǵa jeke úı satyp alýǵa qoldaý kórsetti. Áleýmettik jaǵynan az qamtylǵan otbasylarǵa arnap, arnaıy qor ashtyq. Qordaǵy qarjy sondaı muqtaj jandarǵa jumsalady. Bul oraıda qaıyrymdylyq sharalary jalǵasyn tabatyn bolady,–deıdi Tekeli qalasynyń ákimi Bahtıar Ónerbaev.