Búgin, «Sheıh Sýrýr jáne sheıh Saıf Bın Mýhammed Al Nahaıan» atyndaǵy qordyń uıymdastyrýymen Mańǵystaý aýdanynyń Saı-Ótes aýylynda birazdan beri qalyptasqan dástúrge sáıkes Mańǵystaý oblysynyń Kendirli-Qaıasan qoryqtyq aımaǵyndaǵy dýadaq popýlásıasyn kóbeıtý maqsatynda jyl saıynǵy dýadaq qusyn tabıǵat aıasyna jiberý sharasy ótkizildi. Joba, joıylyp bara jatqan sırek kezdesetin dala qustary retinde Qyzyl kitapqa engizilgen, dýadaq qusynyń popýlásıasyn saqtaý jáne qalpyna keltirýge baǵyttalǵan.

Osy jyly 600 qusty tabıǵat aıasyna jiberý josparlanǵan. Qustar Túrkistan oblysynda ósirilip, ushaqpen jetkiziledi. Qor tabıǵat aıasyna jabaıy qusqa genetıkalyq jaǵynan barynsha jaqyn dýadaqty jiberýdi kózdeıdi, sol sebepti jabaıy jáne ósirilgen qustyń arasynda úlken aıyrmashylyq joq. Jyldyń sýyq kezderi dýadaq qystyq volerlerge ornalastyrylady, onyń ishinde arnaıy qondyrǵylar arqyly dýadaqtyń ushýy kezindegi tabıǵı jaǵdaılarǵa barynsha beıimdelgen temperatýralyq, jaryq jáne basqa da rejımder qamtamasyz etiledi. Atalǵannyń barlyǵy qustyń ózin qonys aýdaryp ushyp bara jatqandaı sezinýi úshin jasalady. Atalǵan sanattan bólek, qazaq dalasyna 2009 jyldan beri jyl saıyn Abý-Dabı qalasynda ósirilgen qustar jiberiledi.

Bul joba dýadaq qusynyń barlyq tirshilik etý arealy boıynsha joıylyp ketýin boldyrmaý maqsatyndaǵy halyqaralyq dýadaq qusyn ósirý baǵdarlamasynyń quramdas bóligi bolyp tabylady. Baǵdarlamany Halyqaralyq dýadaqty qorǵaý qory (HDQQ) júrgizedi, qordyń negizin BAÁ prezıdenti, sheıh Halıf Ben Zaıd al-Nahaııan dýadaqtyń sanyn álemdik deńgeıde qalpyna keltirý jáne saqtaý maqsatymen qalaǵan. Qustardyń ómir súrýine eń qolaıly oryndardy anyqtaý úshin Qazaqstanǵa ózge elderden ekolog-mamandar keldi.

 Sharanyń qarjylandyrylýy Birikken Arab Ámirlikteri memleketimen, jekeleı alǵanda joǵary mártebeli sheıh Sýrýr men sheıh Saıf Bın Mýhammed Al Nahaıanmen, jáne Qazaqstan Respýblıkasy Aýyl sharýashylyǵy mınıstrliginiń Orman sharýashylyǵy jáne janýarlar álemi komıtetimen birlese otyryp júzege asyrylady. Atalǵan shara bizdiń elderimizdiń arasynda qol qoıylǵan halyqaralyq kelisimderdiń aıasynda 2001 jyldan bastap júzege asyp kele jatqan tabıǵatty qorǵaý baǵdarlamalaryn damytý maqsatynda ótkizilip jatyr.

Mańǵystaý oblysynyń ákimdiginiń qoldaýy arqasynda shara jyl saıyn ótetin mártebege ıe boldy. Osynyń arqasynda seriktestik bastalǵan ýaqtyttan beri óńirdegi ekologıalyq tepe-teńdikti ustap turý baǵytynda paıdaly tájirıbe jınaqtaldy.