Indonezıanyń saılaý komısıasynda jumys isteıtin 92 qyzmetker daýystardy sanaý barysynda zoryǵyp qaıtys boldy. Budan bólek 374 adam dál osy sebeppen aýrýhanaǵa túsken. Memlekettiń Ortalyq saılaý komısıasynyń tóraǵasy Arıf Býdıman dúnıeden ozǵan jáne zardap shekken qyzmetkerlerdiń otbasyna 2,1-2,5 myń dollar kóleminde ótemaqy tóleýdi usyndy.

Býdımannyń aıtýynsha, munsha adam ólimine saılaýdaǵy daýystardy sanaý barysyndaǵy zoryǵý sebep bolǵan. Kóptegen saılaý ýchaskelerinde adamdar táýlikten asa ýaqyt úzilissiz jumys jasaǵan. Saılaý komısıasyndaǵy qyzmetkerlerdi zoryqtyra jumysqa jegýdiń dárejesin tómendetýge ýáde berildi.

Zoryǵý sebebimen dúnıeden ótkender arasynda 15 polısıa qyzmetkerleri de bar. Quqyq qorǵaý organdarynyń músheleri saılaýdan keıingi jol-kólik oqıǵalarymen aınalysýda qaza tapqan.

"Qaza tapqandardyń kópshiligi Shyǵys Kalımantande, Soltústik Sýmatrde, Shyǵys Nýs-Tengarde, Batys Iavada, Ońtústik Kalımantande, Shyǵys Iavada, Batys Nýs-Tengarda, Djakarte men Ońtústik Sýlavesıde", - dedi Indonezıa polısıa shtabynyń baspasóz hatshysy Dedı Prasetıo.

Indonezıa prezıdenti Djoko Vıdodo qaza tapqandardyń otbasyna qaıǵyryp kóńil aıtty. Sonymen qatar, dúnıeden ótkenderdi "demokratıa jolyndaǵy jaýyngerler" dep atady.

Eske sala keteıik, Indonezıadaǵy prezıdent saılaýy 17-sáýirde ótti. Elde prezıdentti, parlamenttiń eki palatasynyń depýtattaryn, provınsıalar men okrýgterdegi quqyq qorǵaý organdarynyń múshelerin saılady. 800 myńnan astam saılaý ýchaskesi jumys jasap, halyqtyń 82 paıyzy saılaýǵa qatysty. Indonezıada daýys berý múmkindigi bar halyqtyń sany – 192 mıllıon adam. Resmı qorytyndy 22-mamyrǵa deıin jaryq kórýi tıis.