Búgin elordadaǵy "Nur-Otan" partıasynda QR Aqparat jáne qoǵamdyq damý mınıstri Dáýren Abaev qoǵamdyq qabyldaý ótkizdi dep jazady Qamshy.kz aqparat agenttigi baq.kz saıtynyń deregin negizge alyp. 

Jıyn barysynda Almatydan onlaın qosylǵan tanymal jýrnalıs Bıbigúl Dáýletbekqyzy 7-arnada kúndelikti tikeleı efırde shyǵatyn "Óz oıym" baǵdarlamasyn jabýdy surady. 

"Qurmetti, Dáýren Áskerbekuly! Men 15 jyldan beri telejýrnalıstıkada júrmin. Qazirgi kezde áleýmettik jeliniń óte belsendi qoldanýshylarynyń birimin. Instagramda meniń jazbalarymdy 2,5 mıllıon adam oqıdy. Sizben feısbýkte dos emespiz. Sondyqtan "Nur-Otan" partıasy Tóraǵasynyń birinshi orynbasary Máýlen Áshimbaevty belgilep, osy baǵdarlama jaıly birneshe ret jazdym. Bul jaıly eń alǵash "jaıdarmanshy" Nurbolxan Sharapov bastady. Ony jýrnalıs áriptesim Asxat Sadyrbaı qostady. Kúndizgi 15:00-de bul baǵdarlama tikeleı efırde shyǵyp, anaıy taqyryptardy jıi qozǵaıtyn bolǵan. Ásirese, "qyzdyq perdeni" saýdalaýshylar bet-beınesin jappaı efırge shyǵyp júr. Qazir osyny estigen Qytaı, Qyrǵyzstannyń aqparat quraldary bizge kúlip, "qazaq qyzdary qyzdyq perdesin 1 mıllıonǵa satady" dep jazyp jatyr. Osy jaǵdaı bizge abyroı ápermeıtinin jaqsy bilesizder. Sondyqtan osy saryndas baǵdarlamalardy jabýdy suraımyn", - dedi jýrnalıs. 

Al mınıstr óz jaýabynda "Óz oıym" baǵdarlamasyn jaba almaıtynyn jáne oǵan quqyǵy da joq ekenin aıtty.

"Bıbigúl Dáýletbekqyzy, sizge alǵys bildiremin. Ózińiz sekildi azamattardyń eldiń bolashaǵyna alańdap, qoǵam úshin jany ashyǵany qýantady. Biraq "Jetinshi arna" jekemenshik arna. Men tek zań aıasynda ǵana shara qoldana alamyn. Eger "Óz oıym" baǵdarlamasy terorızm sekildi zańda tyıym salynǵan taqyryptardy nasıxattaıtyn bolsa ǵana biz toqtata alamyz. Al basqa jaǵdaıda bizdiń quzyrymyz joq. Sosyn mynany aıta keteıin, ózderińiz osyndaı jıyn kezinde "Ana baǵdarlamany jap, mynany jap" dep aıtasyzdar da, keıin mınıstr sóz bostandyǵyna shekteý qoıyp jatyr dep taǵy shýlaısyzdar", - dep túsindirdi Dáýren Abaev. 

Mınıstr sóz sońynda jýrnalıs Bıbigúl Dáýletbekqyzy "Óz oıym" sekildi xaıp qýǵan baǵdarlamanyń ornyna rýxanı balama joba jasaıtyn bolsa, efırge shyǵarýǵa daıyn ekenin aıtty.

Usynǵan: Ásel Bolatqyzy