Májilis tóraǵasy Nurlan Nyǵmatýlın mádenıet jáne sport mınıstrligine "taza" sport úshin kúres máselesinde bos sózdi doǵaryp, naqty iske kóshýdi tapsyrdy, dep habarlaıdy Qamshy.kz aqparat agenttigi Sputnik Qazaqstannyń deregine súıenip.

Búgin májilistiń jalpy otyrysynda Ákimshilik quqyq buzýshylyq týraly kodekske ózgerister men tolyqtyrýlar engizý týraly zań jobasy qaraldy.

Sporttaǵy dopıng máselesi

Curaq-jaýap barysynda depýtat Záýresh Amanjolova mádenıet jáne sport mınıstrliginiń ókili men zań jobasy boıynsha baıandama jasaǵan ádilet mınıstri Marat Beketaevqa suraq qoıdy. Depýtattyń aıtýynsha, búginde búkil álem sporttaǵy dopıng, jarystyń tyıym salynǵan túrleri, aldyn ala kelisilgen machtarmen kúresýde.

"Jaqynda parlament úkimet engizgen dene shynyqtyrý jáne sport týraly zań jobasyn qarady. Bul qujat "taza" sport pen "taza" jeńiske jol ashady. Onda sportshylardyń, bapkerler men uıymdastyrýshylardyń jaýapkershiligin kúsheıtetin túzetýler qarastyrylǵan. Alaıda biz búgin qarap jatqan zań jobasynda sportshylar jáne jarys uıymdastyrýshylaryn aqshaǵa satyp alǵany úshin salynatyn aıyppul somasyn 200-den 100 AEK-ke deıin tómendetý qarastyrylyp otyr jáne osy zań buzýshylyq úshin ákimshilik qamaýǵa alýdy alyp tastaý kózdelgen", - dedi Amanjolova.

Buǵan qosa, depýtattyń aıtýynsha, zań jobasy zańsyz syıaqy bergen adamnyń jazasyn jeńildetýdi kózdeıdi.

"Osyǵan baılanysty, mende mynadaı suraq: Kodekstiń 174-babynyń qazirgi redaksıasyn saqtaý qajet dep oılamaısyzdar ma?", - dedi ol.

Ádilet mınıstri Marat Beketaev bul túzetýdiń asyǵystyqpen jasalǵanyn aıtty. Mınıstr depýtattyń atalǵan redaksıany saqtaý kerek degen usynysymen kelisti.

Bul túzetýdi mádenıet jáne sport mınıstrligi engizgen eken.

Sport vıse-mınıstriniń pikiri

Mádenıet jáne sport vıse-mınıstri Erlan Qojaǵapanov kezinde sport federasıasyn basqarǵan adam retinde sporttaǵy dopıng problemasymen jaqsy tanys ekenin atap ótti.

"Árıne, biz qoldanystaǵy Kodekstiń normasynyń saqtalǵanyn qoldaımyz. Men óz tarapymnan aıtarym: biz mınıstrlikte bul máseleni talqylap, bul túzetýdi kim engizgenin anyqtap, jaýapqa tartamyz. Osy oraıda osyndaı olqylyqty tapqan depýtattarǵa alǵys aıtqym keledi. Biz jankúıerler aldynda betimiz qyzaryp, uıalmaıtyn bolamyz. Bul normany, tipti, qylmystyq jaýapkershilikke deıin qatańdatýǵa bolady", - dedi vıse-mınıstr.

Nyǵmatýlın vıse-mınstrge nege shúılikti?

Pikirin aıaqasty ózgertken vıse-mınıstr Nyǵmatýlınge jaqpaı qaldy. Májilis tóraǵasy, tipti, mádenıet jáne sport mınıstrliginiń jazany kúsheıtý týraly ózgeristi jumys tobyna qashan engizgenin de aıtyp berdi.

"Myna hat, jumys tobyna keshe ǵana túsken. Onda sizdiń mınıstrlik jaýapkershilikti qamaýǵa alý túrindegi jazaǵa deıin kúsheıtýdi kórsetken. Osy zalda mádenıet jáne sport mınıstrliginiń sport týraly zań jobasyn talqylaǵanymyzǵa bir aı da bolǵan joq. Men sol kezde bos sózden naqty iske kóshý kerektigin aıtqan edim. Alaıda, ókinishke qaraı, esh ózgeris joq. Bir aı buryn qatańdatý kerek deseńizder, endi kelip, jazany jeńildetýdi surap otyrsyzdar. "Taza" sport úshin kúreskenderińizdiń túri osy ma? Betimiz qyzaryp, uıalmaıtyn bolamyz deısiz. Dál qazir osyndaı shala jumys úshin uıalýyńyz kerek", - dedi spıker.

Vıse-mınıstr Nyǵmatýlıniń aıtqandarymen sózsiz kelisti.

"Bos sózdi qoıyp, iske kóshińder", - dep tapsyrdy Nyǵmatýlın.

Usynǵan: Nazerke Labıhan