Amerıka Senaty osy laýazymǵa taǵaıyndalǵan AQSH-tyń Qazaqstandaǵy Tótenshe jáne ókiletti elshisi Ýılám H.Mozer Atyraýǵa keldi. Munaı-gaz salasyndaǵy kásiporyndardy aralaǵan elshi Atyraý oblysynyń ákimi Nurlan Noǵaevpen kezdesti, dep habarlaıdy Óńirlik komýnıkasıalar qyzmeti.
-Eki el arasyndaǵy áriptestik baınalys qarqyndy damyp keledi. Qazaqstan táýelsizdik alǵannan bastap bizdiń kompanıalar ınvestısıalyq jobalarǵa belsendi qatysýda. Bul bizdiń elimizge, Elbasy saıasatyna degen senimdi bildiredi. Eki aradaǵy ózara baılanystyń keńeıýi osyǵan dálel,-dedi Nurlan Noǵaev. – Elbasynyń, memleket basshysynyń ınvestısıaǵa qolaıly orta qalyptastyrý jónindegi saıasaty el ekonomıkasyn damytý úshin tyǵyz halyqaralyq baılanys ornatýǵa múmkindik berip otyr.
Oblys ákimi AQSH-tyń Qazaqstandaǵy Tótenshe jáne ókiletti elshisine óńirdiń jetistikteri týraly aıtty.
-Qazaqstanda óndiriletin munaıdyń jartysy Atyraý oblysynyń enshisinde jáne kóp bóligi «Teńizshevroıl» kompanıasynyń úlesinde. Elbasynyń munaı-gaz salasyn damytý, sonyń ishinde kómirsýtek shıkizatyn tereńdetip óńdeý týraly tapsyrmasyn oryndaı otyryp, aımaqta joǵary qosylǵan qun salyǵy bar munaı-hımıa ónimderin shyǵarý boıynsha alǵyshart jasalǵan,-dep atap ótti Nurlan Noǵaev.
Aımaq basshysy sheteldik qatysýy bar munaı kompanıalarynyń oblys aýmaǵynda áleýmettik jobalardy júzege asyrýǵa qosyp júrgen úlesterin atap ótti. Bul úrdis jańa jumys oryndaryn qurýǵa, halyqtyń ál-aýqatyn arttyrýǵa yqpal etip otyr.
AQSH-tyń Qazaqstandaǵy Tótenshe jáne ókiletti elshisi Ýılám H.Mozer óz kezeginde bul Atyraýǵa alǵashqy sapary emes ekenin aıtty.
-1998 jyly Atyraýǵa, "Teńizshevroıl" kompanıasyna keldim. Ol kezde energetıka boıynsha attashe edim. Sodan beri Atyraýda kóp ózgerister bolypty, ınfraqurylym, halyqtyń jaǵdaıy biraz jaqsarǵan. Oń ózgeristerde munaı kompanıalary ınvestısıalarynyń úlesi bar ekeni anyq. Men el aýmaǵynda jumys istep jatqan sheteldik kompanıalar atynan Qazaqstan basshylyǵyna alǵys aıtqym keledi. Kompanıalar úshin aımaqtaǵy bıliktermen ózara baılanysta bolýdyń mańyzy zor, - dep atap ótti Ýılám H.Mozer.
