«Charity Bike Ride Atyrau – 2019» qatysýshylary úshin júgirý qashyqtyǵy 9 shaqyrymdy quraıdy, dep habarlaıdy Atyraý qalasy ákimdiginiń baspasóz qyzmeti.

Ekinshi jyl saıynǵy velosherý «Atyraý oblysyndaǵy sportty qoldaý jáne damytý» qoǵamdyq qorynyń uıymdastyrýymen, sport jáne dene shynyqtyrý basqarmasy jáne Atyraý qalasy ákimdiginiń qoldaýymen ótedi. «Charity Bike Ride Atyrau – 2019» qatysýshylar úshin júgirý qashyqtyǵy 9 shaqyrymdy quraıdy, jappaı velosherýge barlyq nıet bildirýshiler qatysa alady.

- Velosherýdiń basty maqsaty – óńirdegi velosportty damytý. Ótken jyly «Atyraý oblysyndaǵy sportty qoldaý jáne damytý» qoǵamdyq qorynyń uıymdastyrýymen Qazaqstannyń kásibı velosportshysy Aleksandr Vınokýrov, Olımpıada chempıony Ilá Ilın jáne basqa da belgili tulǵalar qatysqan «Charity Bike Ride Atyrau – 2018» alǵashqy qaıyrymdylyq velosherýi ótken bolatyn. Velosherý nátıjesinde Atyraý qalasynda veloortalyq ashylǵan edi, - deıdi qalalyq sport jáne dene shynyqtyrý bóliminiń basshysy Nurbek Ahmedıarov.

Aıta keteıik, bul jyly qatysýshylar tirkeýden ótpeıdi. Jalpy jınalý M.Ótemisov atyndaǵy oblystyq akademıalyq drama teatry alańynda bastalady, bastalýy 17.00-ge bekitilgen, velosıpedshiler Sultan Beıbarys aımaǵynda máre syzyǵyn kesedi. Velosherýden keıin 19.00-de alańda qatysýshylardy óńirlik shyǵarmashylyq ujymdardyń qatysýymen konserttik baǵdarlama kútedi.

-Bıylǵy jyly márede seriktes kompanıalardyń taǵam ónimderi satylady. Saýdadan túsken barlyq qarajat veloortalyqqa qajetti sporttyq quraldar alýǵa jumsalady, - deıdi «Atyraý oblysyndaǵy sportty qoldaý jáne damytý» qoǵamdyq qorynyń resmı ókili Talǵat Ýtegýlov.

Jappaı velosherý sporttyq jarys bolyp eseptelmeıdi jáne velosportty qoldaý men damytýǵa jáne salaýatty ómir saltyn dáripteýge negizdelgen.