Qazaqstannyń eńbek sińirgen qaıratkeri, aqyn, aıtys óneriniń janashyry Júrsin Erman óziniń sózin burmalaǵan jýrnalıserge renjýli. Onyń sózinshe, keıbir tilshiler taratqan qate aqparattan keıin aqynnyń prezıdenttik saılaýǵa qatysty aıtqan oıy múldem teris maǵynada qabyldanǵan kórinedi.
Eske salaıyq, keshe Aıtys aqyndary men jyrshy-termeshilerdiń halyqaralyq odaǵy Almatyda óz quryltaıyn ótkizip, onda odaq músheleri «Nur Otan» partıasy atynan Qasym-Jomart Toqaevtyń saılaýǵa usynylýyna qoldaý bildirgen edi.
Osynaý jıynnan keıin birqatar BAQ ókili Júrsin Ermannyń sózinen úzindi keltirip, onyń da saılaýǵa qatysqysy kelgenin, alaıda artynsha «joǵarydan qysym kórsetilgenin» jazǵan bolatyn. Aqynnyń ózi bolsa mundaı málimdeme jasamaǵanyn, jýrnalıser onyń sózin burmalaǵanyn aıtyp otyr.
«Biz keshegi quryltaıda Nur Otan partıasynyń Tóraǵasy Nursultan Nazarbaevtyń prezıdenttik saılaýǵa Qasym-Jomart Toqaevty usyný bastamasyn qoldaımyz degen sheshimge keldik. Jınalǵandaǵy negizgi maqsatymyz da sol edi. Osy jıynnan keıin keıbir jýrnalıser meniń sózimdi burmalap, múldem basqa maǵynada jazyp shyǵypty. Olar sózdi túsinbeıdi nemese ádeıi túsingisi kelmeıdi», - dep renishin aıtty Júrsin Erman.
Aıta keteıik, 24 sáýirde Astanada Aıtys aqyndary men jyrshy-termeshilerdiń halyqaralyq odaǵy quryltaı ótkizgen bolatyn. jıynǵa 120-dan astam aıtysker-aqyn jınalyp, qazirgi ónerdegi ózekti problemalardy ortaǵa saldy. Sondaı-aq, aqyndar áriptesterin 9 maýsym kúni bolatyn prezıdenttik saılaýda belsendilik tanytýǵa shaqyrdy.