29 sáýirde Almaty qalalyq mamandandyrylǵan aýdanaralyq ákimshilik soty ál-Farabı dańǵyly boıyndaǵy jaıaý júrginshiler kópirine Qazaqstan Konstıtýsıasynan sıtata ilgen Roman Zaharovty usaq buzaqylyq babymen 5 táýlikke qamady. Bul týraly Zaharovtyń advokaty Erlan Erbolatuly málimdedi dep habarlaıdy Qamshy.kz aqparat agenttigi Azattyq radıosyna silteme jasap.

Áleýmettik jelidegi sýretterge qaraǵanda, Zaharov ilgen bannerde Konstıtýsıanyń 3-baby 1-tarmaǵyndaǵy "Memlekettik bıliktiń birden-bir bastaýy - halyq" degen sóz jazylǵan.

Advokat "Úlgersek Zaharovqa shyqqan sheshim ústinen búgin shaǵym túsiremiz" dedi. Erbolatulynyń aıtýynsha, olar Zaharovty qamaý týraly sot qaýlysyn áli almaǵan.

"Polısıa vıdeobaqylaý kamerasyndaǵy beıneni de, ózderiniń vıdeojetondaryndaǵy jazbany [sotta] kórsetpedi. Vıdeo polısıanyń jeke qurylǵysynan kórsetildi", - dedi advokat. Onyń sózinshe, bul vıdeony iste aıǵaq dep tanymaý týraly advokat ótinishin sot qanaǵattandyrmaǵan.

"Sot qaýlysyn ala sala, sheshim ústinen shaǵymdanamyz", - dedi Erbolatuly.

Advokattyń aıtýynsha, Zaharov dúısenbi kúni tańerteń ustalǵan. Almaty qalalyq sotynyń baspasóz hatshysy Dıas Mahambetov bul aqparatty rastady.

"Ákimshilik quqyq buzýshylyq kodeksiniń 434-baby 1-tarmaǵymen (qoǵamdyq oryndardy lastaý, onyń ishinde belgilenbegen oryndarǵa komýnaldyq qaldyqtardy tastaý) 5 táýlikke qamaldy. Adam júretin jerge plasık baý, skoch pen aq mata sıaqty turmystyq qaldyq tastaǵan", - dedi Mahambetov.

Sot aldynda júrgen Azattyq tilshisine Zaharovtyń dostary "sýretshini polısıa bólimshesine 9 saǵat ustady" degen. Qalalyq sot tilshiniń "Bul ras pa?" degen suraǵyna "Bilmeımin" dep jaýap berdi.

Usynǵan: Ádilet Mádenıet