Bıyl Nur-Sultan qalasynda Uly Otan soǵysynyń ardagerlerine 519 myń teńgeden beriledi dep habarlaıdy Qamshy.kz aqparat agenttigi Elorda ákimdiginiń resmı saıtyna silteme jasap.

Nur-Sultanda Uly Otan soǵysynyń 71 ardageri turady. Qalalyq jumyspen qamtý jáne áleýmettik qorǵaý basqarmasy ardagerler jáne múgedektermen jumys bóliminiń basshysy Gúlzada Jekebaevanyń málimetinshe, Uly Jeńistiń 74 jyldyǵyn merekeleý aıasynda astanada UOS ardagerleri men olarǵa teńestirilgen jandarǵa jalpy somasy 402 888,9 mln teńgeni quraıtyn áleýmettik kómek qarastyrylǵan.

"Uly Otan soǵysynyń 71 qatysýshysy 519 myń teńgeden alady; Uly Otan soǵysynyń qatysýshylary men múgedekterine beriletin jeńildikter men kepildikter boıynsha teńestirilgen 332 adam 22 725 teńge (9 AEK) alady; soǵysqa qatysýshylarǵa beriletin jeńildikter men kepildikter boıynsha teńestirilgen ózge sanattaǵy 3 519 adam 11 363 teńgeden (4,5 AEK) alady", – dedi Gúlzada Jekebaeva. Soǵys ardagerleri men olarǵa teńestirilgen adamdar úshin komýnaldyq qyzmetterdi tóleýge aqshalaı ótemaqy qarastyrylǵan. Ótemaqy 1 609 adamǵa beriledi. Onyń jalpy somasy 127 054 myń teńgeni qurady.

Uly Otan soǵysynyń ardagerleri jáne olarǵa teńestirilgen 2 700 adamdy dárimen qamtamasyz etýge jalpy somasy 33 500 myń teńge qarastyrylǵan. 71 adam (jalpy somasy 1 214,5 myń teńge) merzimdi basylymdarǵa, monshaǵa jáne shashtaraz salondaryna barý úshin áleýmettik kómek alady. Uly Otan soǵysynyń ardagerleri men olarǵa teńestirilgen adamdarǵa arnalǵan sanatorıı-kýrorttyq emdeýmen 395 adam qamtylady (60 830 myń teńge).

Jekebaevanyń aıtýynsha, Aýǵanstannan áskerdi shyǵarýdyń 30-jyldyǵyna oraı qosymsha Aýǵanstandaǵy soǵys qımyldaryna qatysýshylardyń qatarynan Uly Otan soǵysynyń qatysýshylary men múgedekterine teńestirilgenderge jeńildikter men qosymsha áleýmettik kómek kórsetildi. 30 myń teńge kólemindegi tólemdi 1 264 adam aldy.

Odan buryn 1 267 adamǵa 28792,6 myń teńge tólendi, sondyqtan ınternasıonalıs jaýyngerlerdiń jyl saıyn alǵan áleýmettik kómek esebimen qosa eseptegende jalpy somasy 52725 teńgeni qurady. Budan basqa, Uly Otan soǵysynyń ardagerleri men olarǵa teńestirilgen adamdar qalalyq jolaýshylar kóliginde jeńildikpen jol júrýge jáne tegin tis protezdeýge quqyly.

Usynǵan: Maqpal Sembaı