Qyzylordada qarjysy bar, peıili keń, biraq ýaqyty tyǵyz kásipker-mesenattardyń qaıyrymdylyq jobalaryn eriktiler toby júzege asyrady dep habarlaıdy Qamshy.kz aqparat agenttigi "Habar 24" arnasyna silteme jasap.

Jabyrqaǵan jandardyń janynan tabylatyndardyń biri – Gúlnár Sársenbaı. Ol 2 búldirshinniń emine qarjy jınaýǵa úles qosyp, birneshe otbasyny udaıy azyq-túlikpen qamtyp keledi.

5 jyldan beri memlekettik mekemede eńbek etip kele jatqan erikti "Oń qolyń bergendi sol qolyń bilmesin" degen támsildi berik ustanady. Gúlnár balǵyndardyń kóńilin kóterý úshin túrli ertegi qoıylymdaryn, múltfılm kórsetilimderin uıymdastyryp júr.

Jomart jandardy ıgi sharalarǵa uıystyra bilgen ol óńirdegi barlyq muqtaj otbasylar eriktiler nazarynan tys qalmaıtynyn aıtady.

"Áleýmettik kómekti qajet etetin otbasylardyń tizimi bar bazasy jasaqtalǵan. Sol otbasylarǵa múmkindikke qaraı azyq-túlik sebetin aparyp beremiz. Merekelerde ol úılerde naýqas, erekshe jaǵdaıdy qajet etetin balalar bolsa, biz merekelik kóńil-kúı syılaý maqsatynda ártúrli qoıylymdar qoıýǵa tyrysamyz. Olarǵa syılyqtar aparýǵa, oıynshyqtar, bala tek tamaqpen ǵana kún kórmeıdi ǵoı. Oǵan oıynshyq, erekshe emosıa kerek. Biz solardy syılaýǵa tyrysamyz" ,- deıdi oblystyq jastar saıasaty máseleleri basqarmasynyń bólim basshysy Gúlnár Sársenbaı.

Usynǵan: Ádilet Mádenıet