Reseıdiń Aýǵanstan astanasy Kabýl qalasyndaǵy elshiliginiń baspasóz attashesi Nıkıta Ishenko "Vkontakte"-degi paraqshasynda "Talıban" qozǵalysynyń burynǵy ókilderimen túsken sýretin jarıalady dep habarlaıdy Qamshy.kz aqparat agenttigi Bıznes Online basylymyna silteme jasap.

"Talıban" qozǵalysy Reseı aýmaǵynda tyıym salynǵan terorıstik uıym. Keýdelerine "Georgıı lentalaryn" taqqan aýǵandyqtarmen túsken sýretiniń astyna elshilik qyzmetkeri "talıbandyqtar & georgıı lentalary" degen jazba da qaldyrǵan. Bul jazba reseılik BAQ-tyń narazylyǵyn týǵyzdy. Óz jazbasy qyzý talqyǵa túskennen keıin ǵana elshilik ókili jelidegi jazbasyna "burynǵy talıbandyqtar & georgıı lentalary" degen ózgeris engizdi. Sonymen qatar, Ishenko Reseılik BAQ ókilderine terrorlyq uıymnyń músheligine kiretin adam Reseı elshiliginiń ǵımaratyna kire almaıtynyn da eskertti.  

Fotosýret Kabýldegi elshiliktiń 9 mamyr - Jeńis kúni qarsańynda ótkizgen resmı qabyldaýynda túsirilgen. Shaqyrylǵan qonaqtar arasynda Aýǵanstandaǵy eń iri qozǵalystardyń biri bolyp sanalatyn "Talıban" qozǵalysynyń burynǵy ókilderi de bolǵan.

"Talıban" qozǵalysy Reseıde resmı túrde terorıstik jáne ekstremıstik uıym retinde tirkelgen.    

Usynǵan: Dáýren Sybanbaı