Eki el arasyndaǵy qalyptasqan dostyqty ilgeriletý, áriptestik baılanysty nyǵaıtý maqsatynda Qazaqstannyń Ózbekstandaǵy jylyna oraı Jambyl oblysynan bir top mádenı delegasıa Ózbekstan Respýblıkasynyń Jızaq oblysyna bardy. Arnaıy bekitilgen baǵdarlamaǵa sáıkes, óńirlik óner ıeleriniń kezekti gala konserti Jızaq oblystyq mýzykalyq drama teatrynda ótti. Sahnaǵa Jambyl oblysy ákimdigi mádenıet, arhıvter jáne qujattama basqarmasynyń basshysy Dúısenáli Byqybaev pen Jızaq oblysy ákiminiń orynbasary Azızbek Egamberdıev, Jızaq oblystyq mádenıet basqarmasynyń basshysy Kamol Fahrodov baýyrlas eki el arasyndaǵy júzege asyp jatqan ıgi is-sharalar ǵasyrlar boıy úzilmeı kele jatqan mádenı baılanysty odan ári nyǵaıta túsetinine senim bildire otyryp, jambyldyq delegasıaǵa qasıetti Mekke qalasy men Ózbekstannyń ǵajaıyp tabıǵaty sýrettelgen saǵattaryn syıǵa tartty. Óz kezeginde áýlıeatalyq delegasıa da Jambyl oblysy ákimdiginiń atynan oblys sheberleriniń qolynan shyqqan jyr alyby Jambyl Jabaevtyń beınesi órnektelgen kilemshe jáne «Kóne Taraz» kartınasyn tabys etti.

  Jambyl oblysynan barǵan Kenen Ázirbaev atyndaǵy Jambyl oblystyq fılarmonıasynyń «Alataý» fólklorlyq ansambli men Sarysý aýdandyq «Aıjan qyz» halyqtyq bı ansambli Jızaq jurtshylyǵyna jergilikti jáne Qazaqstan kompozıtorlarynyń kúıleri men ásem ánderin usynsa, aıtysker aqyn, Respýblıkalyq aqyndar men termeshiler qoǵamynyń múshesi Dıdar Basyqaraev baýyrlas ózbek eline qazaqtyń qasıetti qara dombyrasymen arnaýyn aıtyp, kórermenniń kóńilinen shyqty. Sonymen qatar, Kenen Ázirbaev atyndaǵy Jambyl oblystyq fılarmonıasynyń ánshisi, QR Mádenıet salasynyń úzdigi Ońal Azamatova ózbek halqynyń tanymal «Ketma» ánin shyrqap, kópshiliktiń kóńilin kóterdi.

Dostyq sapary barysynda Jýaly aýdandyq halyq teatry Baqyt Bedelhannyń «Taǵdyr taqtasy» atty Asanáli Áshimovtyń ómir tarıhyna qurylǵan poetıkalyq dramasyn usyndy. Qoıylymǵa tánti bolǵan halyq qol shapalaqtap, óz rızashylyqtaryn bildirdi.

Sonymen qatar, Qazaqstan delegasıasy Jızaq oblysynyń tarıhı-mádenı oryndaryn tamashalady. Ortalyq Azıadaǵy eń iri jáne kóne shahar, ári Jibek joly boıynda turǵan IýNESKO-nyń álemdik muralar tizimine engizilgen Samarqand qalasynda ornalasqan «Regıstan» alańy, Ámir Temir men Bıbı Haným keseneleri, Myrza Ulyqbek observatorıasy, «Shahın-Zında» jáne «Haziret Qyzyr» memorıaldy keshenine jáne taǵy da basqa eskertkishterge ekskýrsıa jasady.

Dýlat Aıtbaı