Búginde tól sportymyzǵa bólinip jatqan kóńil de, qoldaý da az emes. Esesine jambyldyq jampozdar el birinshilikterimen qatar, álemdik arenalarda da atoı salýda. Ásirese, qazaqtyń ulttyq sporty — qazaq kúresinen Beıbit Ystybaevtaı apaıtós balýandarymyz shyǵýda. Endi mine túıe balýandar beldesken kúreske balǵyndarymyzda kelip otyr. Atap aıtsaq, kúni keshe «Tórtkúl» kerýen saraıynda jasóspirimder bozkilemde baq synasyp, «Oqýshylar Arlanyn» anyqtady.
Jastar jylyna oraı oblys ákimdiginiń bilim basqarmasynyń «Ǵylymı-tájirıbelik dene shynyqtyrý ortalyǵynyń» uıymdastyrýymen ótken dúbirli dodaǵa Taraz qalasy men aýdandardan barlyǵy 87 balýan qatysyp, kil myqtynyń ishinen shyn myqtyny anyqtady.
Jalpy mektep oqýshylary arasynda uıymdastyrylyp otyrǵan tuńǵysh týrnır 60 keliden joǵary absolúttik salmaq dárejesinde jáne olımpıadalyq júıe boıynsha ótti. Bul kúni balǵyn balýandardyń ónerin tamashalaýǵa «Tórtkúl» kerýen saraıyna jıylǵandardyń qarasy qalyń boldy. Balýandarǵa qoldaý bildirip jan-jaqtan qıqýlaǵan jankúıerlerdiń daýysynan qulaq tundy.
Árıne, jarys bolǵannan keıin bireý jeńip, al bireý jeńilip jatatyny zańdylyq. Bul jolǵy básekede Jambyl aýdany, Besaǵash aýyly, Abaı atyndaǵy orta mekteptiń 11-synyp oqýshysy Nurlan Qyrǵyzbek qarsylastaryn alyp ta, shalyp ta uryp, «Oqýshylar Arlany» atandy. Al aqtyq aınalymda sál sáttilik jetispegen oblystyq sporttaǵy daryndy balalarǵa arnalǵan mektep-ınternatynyń 11-synyp oqýshysy Baqdáýlet Erkinbekuly ekinshi orynnan kórindi. Úzdik úshtikti Jambyl aýdany, Asa aýyly, Iý.Gagarın atyndaǵy orta mekteptiń 11-synyp oqýshysy Jantóre Jumabaı túıindedi.
Jarys jeńimpazdary men júldegerlerine M.H.Dýlatı atyndaǵy Taraz memlekettik ýnıversıtetiniń rektory Mahmetǵalı Sarybekov bir jyldyq oqý aqysyna 50 men 100 paıyz aralyǵynda jeńildik taǵaıyndasa, Taraz ınovasıalyq-gýmanıtarlyq ýnıversıtetiniń rektory Erbolat Saýryqov birinshi orynǵa – 150 myń, ekinshi orynǵa – 100 myń jáne úshinshi orynǵa – 50 myń teńge kóleminde syıaqy berdi. Budan bólek, týnır jeńimpazyna qas sheberler qoldan arnaıy daıyndaǵan «Oqýshy Arlany» týrnıriniń logotıpi beınelengen belbeý tabys etildi.
Endi jeńimpazdar men júldegerler aǵymdaǵy jyldyń 25-26 mamyr kúnderi Almaty qalasynda ótetin «Halyq barysy» respýblıkalyq alamanynda óńir namysyn qorǵaıtyn bolady.
Jaıdar Azamat
