Qaı memlekettiń órkendeý jolynda bolmasyn ınvestısıanyń alar orny erek bolǵan. Qarjynyń quıylýy bul el ekonomıkasyn alǵa jyljytyp ǵana qoımaı, keleshegińe de kemeldi jol salady. Sońǵy onjyldyqta Jambyl oblysy da ınvestısıanyń ıgiligin barynsha kórýde.
Al endi qytaılyq ınvestorlar óńirden korbıd óndiretin zaýyt salýǵa nıet tanytýda. Bul jaıynda oblys ákimi Asqar Myrzahmetovtyń ınvestor «North Huajin Chemical Industries Incorporated» kompanıasy men «Taraz hımıalyq parki» AEA-nyń ókilderimen bolǵan kezdesýinde aıtyldy. Kezdesýde «Hımpark Taraz» AEA aýmaǵynda amıak jáne karbamıd óndiretin jobanyń júzege asyrylý barysy talqylandy.
Aıta ketý kerek, «North Huajin Chemical Industries Incorporated» kompanıasy munaı, gaz,hımıalyq ónimder óndirýmen aınalysatyn álemdegi 500 iri uıymnyń qataryna kiredi. Hımıkat pen tyńaıtqysh óndirý salasynda 40 jyldan astam tájirıbesi bar uıym óńirimizde korbıd óńdiretin zaýyt salýǵa nıetti. Bul baǵytta olar ınvestısıa quıyp, quny 600 mıllıon AQSH dollary bolatyn jobany júzege asyrmaq. Zaýyt jylyna 800 myń tonna ónim óndiredi dep kútilýde. 2021-2022 jyldary júrgiziletin qurylys jumystaryna 4 myńǵa jýyq jumysshy tartylyp, zaýyt iske qosylǵanda 400-500 adam turaqty jumyspen qamtylady dep kútilýde.
Kezdesýde atalmysh Qytaı kompanıasynyń vıse-prezıdenti Kang Kıfa óz sózinde jobanyń maqsaty men mańyzdylyǵy jaıly aıtyp ótip, ınfraqurylym máselelerin tilge tıek etti. Ásirese, gaz, elektr, jáne jol máselelerin sheshý boıynsha jeńildikter surady. Bul atalǵan úsh negizgi faktor basty nazarda. Zaýyt salý isi oń qarqynǵa ıe bolady dep kútilýde. Erekshe josparlanyp otyrǵan atalmysh zaýyt óz damý qarqynynan túspeıtinine senim mol.
Óz sózinde óńir basshysy ınfraqurylym máseleleri osy baǵyttaǵy ınvestorlarǵa qatysty tıisti zańǵa sáıkes sheshimin tabatynyn jetkizip, atalmysh jobany oblysta júzege asyrýdyn tıimdi tustaryna toqtaldy. Sonymen qatar ıgi bastama ekenin aıryqsha aıtty.
Sondaı-aq, Asqar Isabekuly múmkindiginshe qajetti jaǵdaılar jasalynatyn aıta kele, ınvestorlarǵa da qoıylatyn naqty talaptar bar ekenin basa aıtty. Oblys ákimi joba boıynsha ashylatyn jumys oryndaryna negizinen jergilikti turǵyndardy tartý kerektigine asa kóńil aýdartty. Bul baǵytta suranysqa oraı memlekettik grant bólip, qajetti mamandardy daıyndaýdy qazirden qolǵa alýǵa bolatynyn aıtyp, naqty usynystaryn jetkizdi.
Jaıdar Azamat
