"Nur Otan" partıasy Tóraǵasynyń Birinshi orynbasary Máýlen Áshimbaev qoǵamnyń barlyq ókilderin dıalogqa shaqyryp, birigip áreket etsek qana maqsattarymyzǵa qol jetkizetinimizdi qadap aıtty dep habarlaıdy Qamshy.kz aqparat agenttigi.

Áshimbaev bul týraly  Demokratıalyq kúshterdiń "Qazaqstan-2050" jalpyulttyq koalısıasynyń otyrysynda aıtty.

Atalǵan is-sharada Koalısıa músheleri Qazaqstan Prezıdenti Qasym-Jomart Toqaev anyqtap bergen el damýynyń naqty baǵyttary men aldymyzǵa qoıǵan jańa mindetterine qoldaý bildirdi.

Máýlen Áshimbaev aldymen Qazaqstannyń damýdyń jańa dáýirine qadam basqanyn aıtty. Sondaı-aq ol elimizde bolyp jatqan saıası ózgeristerdiń zańǵa sáıkes ekenine nazar aýdardy.

– Saılaýda qazaqstandyqtardyń basym bóligi óz daýystaryn Qasym-Jomart Kemeluly Toqaevqa berip, Elbasymyzdyń strategıalyq saıasatynyń sabaqtastyǵy men elimizdiń turaqty damýyn tańdady. Sonyń nátıjesinde Qazaqstanda joǵary bıliktiń aýysýy elimizdiń barlyq zańyna sáıkes júrgizildi. Bul – Qazaqstannyń ishki turaqtylyǵyn qamtamasyz etetin negizgi faktor, – dedi ol.

Sonymen qatar "Nur Otan" partıasy Tóraǵasynyń Birinshi orynbasary ulyqtaý rásiminde Qazaqstan Prezıdenti Qasym-Jomart Toqaev atap kórsetken bılik pen azamattyq qoǵam arasyndaǵy dıalogty damytý máselesine nazar aýdardy.

– Elimizde Prezıdent Jarlyǵymen Ulttyq qoǵamdyq senim keńesi quryldy. Bul – Qazaqstanda azamattyq qoǵamdy damytý jolynda jasalǵan naqty qadam. Memleket basshysy atap ótkendeı, birtutas ult bolyp qalý – bizdiń basty baǵdarymyz. Sondyqtan judyryqtaı jumylyp, qoǵamnyń barlyq ókilderin, sonyń ishinde jastardy da dıalogqa shaqyryp, birigip áreket etsek qana kózdegen maqsattarymyzǵa qol jetkizemiz, – dedi ol.

Otyrysqa eldegi jetekshi partıalardyń basshylary, Parlament depýtattary, Qazaqstan halqy Assambleıasynyń, kásibı jáne qoǵamdyq birlestikterdiń ókilderi qatysyp, óz pikirlerin bildirdi. İs-shara sońynda barsha qazaqstandyqtar men qoǵamdyq-saıası kúshterdi saılaýdan keıingi kezeńde elimizdiń strategıalyq maqsattary jolynda birigýge, Qazaqstan Prezıdentiniń el damýynyń ózekti máselelerine qatysty bılik pen azamattyq qoǵam arasynda turaqty jáne konstrýktıvti dıalog qurý bastamasyn qoldaýǵa shaqyrǵan Úndeý qabyldandy.