"Aıtys" dese, eń aldymen aýyzǵa Júrsin Ermannyń aty keledi. Qazaqtyń tól óneri aıtysty sonaý 1984 jyldan jańartyp-jańǵyrtyp, halyq arasynda keńinen nasıhattap, poezıa tulparlaryn baptap, báıgege qosyp júrgen "Aıtys atasy" Júrsin Erman Stan.kz saıtyna bergen suhbatynda durys joldan bura tartqan aqyndar týraly aıtyp berdi dep jazady Qamshy.kz aqparat agenttigi.

Onyń aıtýynsha, ol eshbir aqyndy aıtystan bólip-jaryp, shettetip kórmegen. Tek qana barynsha shaqyryp, aıtystaǵy aýyzbirshilikti, tól ónerdiń qasıetin, sapasyn saqtap qalǵysy keledi.

Jýrnalıs aqyndar ózara din máselesi nemese basqa da máseleler boıynsha bólinip júrgeniniń sebebin suraǵanda, Júrsin Erman ashyq jaýap berdi.

"Kelisim de, birlik te joq. Aıtys aqyndarynyń odaǵynda jaqynda ǵana ekinshi quryltaı ótkizdik. Barlyq óńirlerden, oblys, aýdandardan 150-den asa aıtysker aqyndar keldi. Soǵan qosylmaı, óz betterinshe júrgen aqyndar bar. Attaryn aıta alamyn. Balǵynbek Imashev, Aınur Tursynbaev, Jandarbek Bulǵaqov sekildi aqyndar bólek júredi, bólek jaılady. Olarǵa ne aıta alamyz? Birlikke shaqyramyz, aıtysqa qatysýǵa shaqyramyz", - dedi ol.

Sondaı-aq, osyndaı suhbattarynda din týraly áńgime qozǵaǵany úshin Balǵynbek Imash ony sotqa bermek bolǵanyn da jasyrmady.

"Jaqynda meniń bes tomdyq shyǵarmalar jınaǵym jaryq kórdi. Sonyń tusaýkeserinde Balǵynbek, Jandarbek, Syrym kelip, endi sizdiń aınalańyzdaǵy aqyndardyń ishinde bolamyz dep qol alyp kelgen edi. Sol tusta olar din jolymen bólek ketip qaldy degen meniń suhbatym  shyqty. Sodan Balǵynbek Imashev habarlasyp, "Men din jolymen ketkem joq. Siz maǵan jala jaýyp otyrsyz. Men sizdi sotqa beremin" dedi. Qashan sotqa shaqyrady eken dep tosyp júrmin. Men ony odan keıin de aıtysqa shaqyrdym. Kelmeı qoıdy", - dedi ol týrasynan tartyp.

Sonymen qatar, Júrsin Erman ishkilikke salynyp, talantyn tul etken Aıan Seıitov týrasynda da pikir bildirdi.

"Ózim qatty jaqsy kóretin aqtóbelik aqyn Aıan Seıitov. Úlken aıtysker aqyn kelip qaldy dep qýanýshy edim. Úsh ret aıtysqa kelip turyp qatyspaı ketip qaldy. Tórtinshi ret shaqyrmadym. Sahnaǵa shyǵýǵa shamasy kelmeıtin aqyndy qalaı shaqyramyn. Ókinishti. Maǵan úıge kelip, jaınamazdy alyp, haramnan aryldym sahnaǵa shyǵaryńyz dep namaz da oqyp kórsetti. Degenmen, odan keıingi aıtysta da opa bergen joq", - dep túıdi sózin aıtys janashyry, aqyn Júrsin Erman.