Mańǵystaýda aýqymdy arnaıy operasıa ótti! Ulttyq qaýipsizdik komıteti men İshki ister mınıstrligi birlese ótkizgen sharanyń nátıjesinde 4 birdeı qylmystyq toptyń joly kesildi. Qylmystyq iste atys qarýlary men oq-dári, sondaı-aq, esirtki saqtaý, adam óltirýge oqtalý, bopsalaý, taǵysyn taǵylar qarastyrylǵan. Tergeý oryndaryna jetkizilgen top músheleri osyndaı aýyr qylmystar boıynsha kúdikti bolyp otyr dep jazady Qamshy.kz aqparat agenttigi KTK telearnasyna silteme jasap.

Tańǵy alageýim. Biraq arnaıy jasaq jigitterinde tynym joq. Saýyt-saımanyn kıinip, qarý-jaraǵyn asynyp, shuǵyl máselemen attanyp barady.

Bes qarý boıda, jigitter saqadaı saı. Áskerı kóligine qaraı asyqqan jigitterdiń maqsaty bir. Mańǵystaý oblysy aýmaǵynda júrgiziletin aýqymdy operasıany júzege asyrý. Shymkentttegi syra zaýytynyń ıesi bolǵan, áıgili Toqtar Tóleshevtiń isi men birneshe jyl burynǵy Aqtóbede bolǵan dinı ekstremısterdi quryqtaý eldi eleń etkizgen mańyzdy oqıǵa bolsa, operasıanyń aýqymy jóninen búgingi shara olardan áldeqaıda asyp tústi. Bir ýaqytta 30-dan astam jerde tekserý sharalary ótpek. Lek-legimen aǵylǵan myna avtobýstar soǵan baǵyt alǵan arnaıy jasaq ókilderi.

Dál qazir arnaıy jasaq jigitteri asa mańyzdy tapsyrmany oryndaýǵa tas-túıin, jolǵa shyǵyp bara jatqan  sát. Meniń ústimde jalpy salmaǵy on kelige jetetin temir qalqan, basymdaǵy kaskaǵa oq ótpeıdi. Oqıǵanyń basy-qasynda júrgen jýrnalıserdiń qaýipsizdigi de jiti eskerilgen.

Kólemdi operasıaǵa qatysýǵa telearna tilshileri múmkindik alyp, kóp uzamaı oqıǵa ornyna jetti. Oılanarǵa ýaqyt joq. Jigitter iske kirisýge daıyn ekendikterin aıtqany sol edi, buıryq ta berile qaldy.

- Tıisti orynǵa keldik. Ary qaraı buıryqty kútemiz.

- Tyńdańyzdar. Shyǵamyz, shyǵamyz. Alǵa, jigitter!

Qalanyń qaq ortasyndaǵy myna úıdiń aldy tym-tyrys. Múlgigen tynyshtyqtyń ortasynda qarý asynǵan Ulttyq ulan jasaǵy aldymen esik-terezeniń mańyn torýylǵa aldy. Kózdegen páter birinshi qabatta. Muzdaı qarýlanǵan jigitter basyp kirýge daıyn.

Jańa ǵana tań atqan shaq. Jurt áli shyrt uıqyda jatyr. Al kúdiktiler ornalasqan páter turǵyny esigin ashar emes. Arnaıy jasaq ázirge esik aldyn kúzetip tur. Birdeńe bolsa, lap berip ishke kirýge daıyn. Ázirge kelissózder júrgizilip jatyr. Bolmaıtyn bolsa, buzyp kirýi múmkin.

İshtegiler aqyry esik ashpady. Ulttyq qaýipsizdik komıteti ókilderiniń jedel qımylynyń arqasynda páter esigin syndyryp kirýge sot sanksıasy daıyn boldy. Báriniń de kútkeni osy sát edi. Apyr-topyr bastaldy da ketti.

Tilshi: Eki bólmeli páterdi jaldap jatqan soqtaldaı 5 jigit bylaıǵy adamǵa beıkúná kóriner. Biraq, Ulttyq qaýipsizdik komıtetiniń olardy ańdyp júrgenine biraz ýaqyt bolǵan. Qolǵa túsirýdiń sáti búgin túskendeı.

-Famılıa?

-Nurmahanov.

-Qaıdan keldiń? 

-Ózennen qydyryp keldim.

Qydyryp júrgen jigitterdiń shyn máninde nemen aınalysqanyn tergeý anyqtap beretin kún de alys emes. Al qala mańyndaǵy myna úıdiń aýlasy endi bolmaǵanda qarý-jaraq qoımasyna aınalyp keter me edi?! Alaıda Ulttyq qaýipsizdik komıtetiniń ańdýyna túskenin mundaǵy jigitter de bilmese kerek. Aýlasynan tabylǵan eki sholaq myltyq, bir tapansha men atys oqtary tap osy úıdiń beıbit tirshiligine keregi shamaly. Aralarynda polısıa qolynan sytylyp ketkisi kelgender de tabyldy. Kútpegen qonaqtar myna jigittiń záresin alǵany bolar, qolyna tereze tusynan kisen salyndy.

-Qashyp ketpek boldyń ba?  

-Jo-joq...

Bólmesinen tapansha tabylyp jatqanda, onyń qashpaımyn degenine sený qıyn. Al myna jaǵdaıda polısıa jasaǵy úıge asqan saqtyqpen kirdi. Arnaıy jasaq aýlaǵa dybyssyz kirip, aldymen esiktiń eki jaǵyna ornyǵyp aldy. Saqtyq kerek. Temir esiktiń arǵy jaǵynda olardy ne kútip turǵany bir Qudaıǵa ǵana aıan. -

-Sálemetsiz be, bul – polısıa.

-Iá. 

-Esikti ashyńyz. Polısıa, jat! Qoldy artqa qoı!

Osy kúni polısıa ókilderiń aldynan shyqqan óńkeı qarý-jaraq saqtaıtyndar, qonystanǵan páterin esirtki ordasyna aınaldyrǵandar, qarý kezenip, eldi tonaıtyndar boldy. Myna jerdegiler esirtkini ońdy-soldy burqyratqanyn dáleldeýdiń ózi artyq sekildi.

-Nege arnalǵan bótelke? İshinde taǵy bireýi tur ǵoı? 

-Bilmedim ony. Biletin adam bilmese...

Mańǵystaý oblysy aýmaǵynda buryn-sońdy mundaı kólemdi operasıanyń júrgizilgeni esimizde joq. Osy joly polısıanyń nysanasyna ilikken 4 birdeı qylmystyq toptyń joly kesildi. Adamdy óltirý maqsatymen urlaý, atys qarý-jaraqtary men esirtki saqtaý, bireýdi bopsalaý - kúdikke alynǵan áreketteri adam shoshyrlyq. Onyń 20-dan astamy tergeý oryndaryna jetkizilip, 16-syna qatysty bultartpaý sharasy qoldanyldy. Sondaı-aq, esirtki zattar men úlken kólemde qylmystyq atys qarýlary tárkilendi.