Keshe Qazaqstan Respýblıkasynyń Prezıdenti Nursultan Ábishuly birqatar memlekettik qyzmetkerlerge taǵaıyndaýlar jasady. Atap aıtar bolsaq, Qazaqstannyń sheteldegi elshiler qosyny úsh fıgýramen tolyqty. Bul týraly «Qamshy» portaly  Aqordanyń baspasóz qyzmetine silteme jasaı otyryp habarlaıdy. Sonymen, Prezıdent jarlyǵymen A.Berdibaı Irak, Lıvan jáne Palestına Respýblıkalaryndaǵy Qazaqstannyń tótenshe jáne ókiletti elshisi bolyp taǵaıyndaldy. Al,  osyǵan deıin Qazaqstannyń  Izraıldegi tótenshe jáne ókiletti elshisi bolyp qyzmet atqaryp kelgen D.Qýanyshbaev myrza endi Kıpr Respýblıkasynda elshilik qyzmet atqaratyn boldy. Sondaı-aq,  Prezıdent N.Nazarbaevtyń jarlyǵy boıynsha Qazaqstannyń Úndistandaǵy ókiletti elshisi qosymsha Shrı-Lanka Demokratıalyq Respýblıkasyndaǵy tótenshe jáne ókiletti elshisi qyzmetin atqaratyn bolady. QR Prezıdentiniń jarlyǵy boıynsha elshiler qosynyna birqatar ózgerister engizildi. Endi atalmysh elder men Qazaqstannyń arasyndaǵy baılanys artatynyna senim bildiremiz. Alaıda, sońǵy ýaqytta qazaq qoǵamynda kóp talqyǵa túsken taǵy bir daýly másele – qazaq-ózbek shekarasyndaǵy keleńsiz jaǵdaılar. Keıbir derekkózderine súıener bolsaq,  Qazaqstan men Ózbekstan Respýblıkasy shekarasynda ózbek sarbazdarynyń qolynan 33 qazaqstandyq azamat qaza tapqan. Sonyń biri, kúni keshe ǵana shekaralyq aımaqtaǵy Qazaqstanǵa tıesili terıtorıada júrgen eki birdeı qazaqstandyqqa ózbek shekara qyzmetkerleri  qarsy oq atyp, saldarynan biri qaza tapqan, al ekinshisi psıhıkalyq kúızeliske ushyraǵan. Bul týraly qazaqstandyq BAQ az jazbady. Eń bolmaǵanda, adamgershilik qaǵıdalaryn eskerip, ózbektiń ókiletti elshisi qaza tapqan azamattyń otbasyna kóńil aıtyp, jaǵdaı suraýǵa jaramaǵany oılandyrady. Eldestirmek elshiden emes pe edi?.. Osyndaı orynsyz jaǵdaılardy eskere kele, QR Prezıdenti elshiler qosynyn jańartyp jatqanda, Qazaqstan Respýblıkasynyń Ózbekstandaǵy ókiletti elshisin aýystyra  ma degen zańdy suraq týyndaıtyny aqıqat. Eki-el arasynda  túrli jaǵdaılarda ózbek shekarashylarynyń qolynan qaza tapqan azamattardyń  suraýyn qazaq elshi Bóribaı Jeksenbın myrza nege suramaıdy?