Tanymal qazaqstandyq kóripkel, reseılik «Bıtva ekstrasenov» teleshoýynyń qatysýshysy Baqyt Jumatova týraly estýińiz bar ma? Iá, dál sol ózi. Kópten beri teleekrandardan kórinbeı ketken kóripkelimiz kólbeńdep qaıta shyqty. Bul joly Ol Qazaqstandaǵy demografıalyq ósim men Izraıl jáne Japonıadaǵy sý tasqynyn, ISHIM uıymynyń joıylatynyn boljady. Bul týraly «Qamshy» portaly RegTV.kz-ke silteme jasaı otyryp habarlaıdy.
Kóripkeldiń aıtýynsha, ol qandaı da bir aqparatty parraleldi álemnen alady-mys. Paralleldi álem – túsiniksiz bolar. Ol múmkin jyndar álemi bolar, álde... Já, endi, qazaqstandyq kóripkeldiń elimizdegi jáne álemdegi saıası jaǵdaılarǵa qatysty jasaǵan boljamdaryna toqtala keteıik.
- Baqyt hanym 2017 jylǵy búkilálemdik EKSPO kórmesine qatysty bylaı depti: «2017 jyly EKSPO kórmesi tynysh ári óte joǵary deńgeıde ótedi. Oǵan eshqandaı kedergi kórip otyrǵan joqpyn. Bul kórme Qazaqstannyń bedelin kóteretin, búkil álemge tanytatyn bolady. Tipti, kórme aıaqtalǵan soń, bizdiń elde túrli sporttyq olımpıadalar uıymdastyrýǵa usynystar túsedi». Tanys sózder me? Iá. EKSPO-nyń el tarıhyndaǵy mańyzdylyǵy Baqyt hanym aıtpasa da biz biletinbiz. Al olımpıadaǵa keler bolsaq, 2022 jylǵy qysqy olımpıada oıyndary men 2017 jylǵy ýnıversıadany ótkizý úshin Qazaqstan HOK-qa usynys jasaǵan jáne eń basty úmitkerlerdiń biri bolǵan. Sondyqtan, bul jerde eshqandaı ıntrıga bolmaıtyny túsinikti.
- Al Qazaqstan, Reseı jáne Ýkraınaǵa qatysty kóripkel hanym ózgeshe málimdeme jasaýdy jón kórgen eken. «Qazaqstanda sheteldik salymshylardyń qarasy artady. Tipti, Reseı men Ýkraınadan kóptegen zaýyt, fabrıkalar Qazaqstanǵa kóshiriledi. Bul 1941 jyldy eske túsiredi. Sondaı-aq, Qazaqstanǵa nemister kóptep keledi»,-deıdi.
- Sonymen qatar, Jumatova sońǵy ýaqyttardaǵy Taıaý Shyǵys pen Sırıada qurylǵan Islam memleketi sodyrlaryna qatysty da boljam jasaǵan eken. Onyń aıtýynsha, bul uıym kóp uzamaı joıylady. «Bul Ál-Kaıda emes. Tipti bul eshqandaı da dinı uıym emes. Bul arnaıy terrormen aınalysatyn qurylym ǵana. Olar qaı jerde munaı bar, sol memleketterdi soıqan salyp, basyp alǵysy keledi. Mysaly, Irak, Sırıa, endigi nysan Iran men Arab ámirlikteri, Saýd Arabıasy bolýy múmkin. Olar memleketti jaýlap alady, munaıyn satyp bolyp, basqasyna aýyz salady. Bar bolǵany osy»,-deıdi kóripkelimiz. Aıtpaqshy, balshy hanym IM-niń búkil álemge joryǵyn Napoleon men Gıtlerdiń áreketine teńep, olardyń Qazaqstanǵa da kóz alartyp otyrǵanyn aıtqan. Alaıda, 2015-2016 jyldyń jeltoqsan aılarynda bul uıym bir jolata joıylady deıdi. Sondaı-aq, balshy hanym QR UQQ tóraǵasy Nurtaı Ábiqaevtyń sózin mysal ete otyryp, IM-di bir ǵana adam basqaryp otyrǵanyn, al qalǵandary shopannyń qoıyndaı artynan erip júrgendigin aıtypty.
- Eń bastysy Baqyt hanymnyń boljaýynsha keleshekte búkil álem memleketteri topan sýdyn astynda qalyp, Batys Sibir men Qazaqstan ǵana tasqynnan aman qalady-mys. Sondyqtan, bizdiń elge japondar qonys aýdarady. Al Aýǵanstan eli jer betinen joıylyp, eýreı halqyn topan shaıyp ketedi eken.
- Kóripkel hanymnyń aıtýynsha, Qazaqstan damýydyń dańǵyl jolyna álde qashan túsip qoıǵan. «Men naqty ýaqytyn aıta alamyn. 2017 jyly Qazaqstan AQSH-pen teń dárejeles bolady»,-deıdi Baqyt Jumatova.
Siz senersiz, senbessiz, bul óz erkińizde. Tek, Baqyt hanym aıtqandardan shoshymańyz. El ne demeıdi... Ýaqyt kórsetedi, bárin.
Nurzat Toǵjan
