Qazgıdromet osy aptada elimizdiń 6 oblysynda óte kúshti aptap ystyq bolatyndyǵy jaıly shuǵyl eskertý taratqan bolatyn. Sınoptıkterdiń málimeti boıynsha 29 maýsym - 1 shilde aralyǵynda kúndiz Atyraý oblysynda +40+43 gradýs aptap ystyq saqtalyp, 30 maýsym - 2 shilde aralyǵynda kúndiz Mańǵystaý oblysynda +40+45 gradýs aptap ystyq kútiletinin jáne 30 maýsym - 2 shildede kúndiz Qyzylorda oblysynda aptap ystyq +45 gradýsqa deıin kóteriletin eskertken edi. Sondaı-aq 30 maýsym - 1 shildede kúndiz Aqtóbe, Qaraǵandy, Qostanaı oblystarynda keı jerlerde +40 gradýsqa deıin aptap ystyq bolýy yqtımal ekendigin aıtqan. Alaıda sınoptıkterdiń belgilep bergen ýaqyty aıaqtalǵanymen, kún qaıraty qaıtar emes. Tipti, elimizdegi aptap ystyq birqatar oblystardy áýrege salǵan.
Áýeli, kúnniń aptap ystyǵynan Qyzylorda oblysy Jańaqorǵan aýdanynda usaq mal qyrylýda. Bul týraly aýdandyq ákimshiliktiń baspasóz qyzmeti málimdedi. Maýsymnyń 24-i men shildeniń 3-i aralyǵynda aptap ystyqtan úsh birdeı otardan 5000 myńǵa jýyq qoı qyrylyp qalǵan. Aýa raıynyń tosyn qubylysynan aýdandaǵy «Yntymaq», «Aqseńgir» jáne «Kóbeldes» sharýa qojalyqtary qyrýar shyǵynǵa batqan. Qyrylǵan maldyń 90 paıyzy jańa týǵan tólder bolǵan. Osy oqıǵaǵa baılanysty arnaıy komısıa qurylyp, aýdandyq veterınarlyq baqylaý komıteti mamandary jaıylym shóbi men sýynyń nusqalaryn jáne qyrylyp qalǵan qoılardyń qanyn teksergen. Saraptama qorytyndysy 15 kúnniń ishinde daıyn bolady, deıdi sharýalar. Al aýdan ákimshiligindegiler bolsa, shopandarǵa aýa temperatýrasynyń kúrt kóterilýine baılanysty maldy kún qaıtqanda óriske shyǵarýdy usynǵan.
Al Ataraý oblysynda Oral ózeni tasyǵannan keıin paıda bolǵan kólderde jappaı balyqtar qyrylýda. Bul týraly Atyraý oblystyq tabıǵatty qorǵaý jónindegi mamandandyrylǵan prokýrorynyń aǵa kómekshisi Sapar Tursynov málimdeıdi. Kólderdegi balyqtyń jappaı qyryýynyń basty sebebi – aýa temperatýrasynyń 40 gradýstan asyp jyǵylǵandyǵy bolýy múmkin.
-Aptap ystyqtan kólder tartylyp, ondaǵy aýa tarylǵan. Saldarynan balyqtarǵa aýa jetpeı, qyrylyp qalǵan. Dál qazirgi ýaqytta balyqtardyń jappaı qyrylýynyń sebepteri anyqtalýda. Mamandar balyq ólekseleri men sýdyń quramyn tekserýde. Al qazir kólderdegi qalǵan balyqtardy aýlap alyp, arnaıy oryndarǵa jiberý jumystary júrgizilýde. Bul kóldegi balyqtardy saqtap qalýdyń jalǵyz joly,-deıdi S.Túrsynov.
Kúnniń kúrt jylynýy tek Qazaqstanda ǵana emes, álemniń birqatar memleketterinde baıqalǵan.
- Japonıada aptap ystyqtan zardap shegýshiler sany artyp, aýrýhanaǵa túskender sany 500-ge jýyqtaǵan. Buǵan deıin Japonıada aptap ystyqtan eki adam kóz jumǵan.
- Úndistanda mamyr aıynan beri beri basylmaǵan aptap ystyqtan 1200 adam qaza tapqan. Ásirese, eldiń ońtústik-shyǵysyndaǵy Andhra-Pradesh jáne Telanga shtattaryndaǵy halyqtyń jaǵdaıy múshkil. Bul ólkede aýa temperatýrasy kúndiz 48,8 gradýsqa deıin kóterilgen.
- Pákistanda aptap ystyqtan kóz jumǵandar sany kún sanap artýda. Búgin bul kórsetkish 400-den asty. Pákistanda temperatýra baǵany Selsıı shkalasy boıynsha 47 gradýsqa jetken. Nurzat Toǵjan
